Qaraǵandy oblysynda qansha múlik ıeleri birlestigi tirkelgen

QARAǴANDY. QazAqparat – Búgingi tańda Qaraǵandy oblysynda 304 múlik ıeleri birlestigi tirkelgen. Bul jaıynda Qaraǵandy oblysynyń energetıka jáne turǵyn úı-kommýnaldyq sharýashylyq basqarmasynyń basshysy Ulantaı Úsenov óńirlik kommýnıkatsııalar qyzmetinde ótken brıfıngte aıtyp berdi, dep habarlaıdy QazAqparat tilshisi.

Qazaqstanda «Keıbir zańnamalyq aktilerge turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» zań kúshine endi.

Oǵan sáıkes, 2022 jyldyń 1 shildesinen bastap PIK qyzmeti toqtatylady.

Onyń ornyna MIB jáne QS keledi. Olar turǵyndarǵa úıdi óz betinshe basqarýǵa múmkindik beredi.

«Osy merzimge deıin kooperatıvter basqarýshy nemese servıstik kompanııa bolyp qaıta qurylýy jáne jańa mártebede úılerge qyzmet kórsetý jónindegi óz qyzmetin jalǵastyrýy tıis. Biraq eger olar turǵyndar jınalysynda tańdalsa ǵana. Eger turǵyndar PIK jumysyna narazy bolsa, páter ıeleri olardyń qyzmetinen bas tartyp, qazirdiń ózinde MIB nemese QS qura alady», – dep atap ótti Ulantaı Úsenov.

MIB – zańdy tulǵa. Ony qurý mehanızmi mynadaı: aldymen turǵyndar jınalysyn ótkizý kerek. Úı ıeleri quramynan úsh jyl merzimge keńes saılanady.

Tóraǵany tańdaý qajet. Onyń ókilettigi jyl boıy jaramdy bolady. Aýdıtordy nemese tekserý komıssııasyn anyqtaý kerek.

Sodan keıin jarǵyny bekitip, HQO-ǵa MIB tirkeý týraly qujattardy tapsyrý kerek.

Onda ótinish toltyrý, jınalys hattamasyn usyný jáne 1 AEK (2 917 teńge) mólsherinde memlekettik baj tóleý qajet.

Búkil qyzmet barysynda MIB-ten eshqandaı salyq alynbaıdy.

QS qurý úshin turǵyndardyń 100% kelisimi qajet. Ol zańdy tulǵa bolyp tabylady. Jarǵy jáne tirkelim ádilet organy men HQO-da tirkeýdiń qajeti joq.

Biraq jergilikti atqarýshy organdarda tirkeý esebine turý kerek. Úı turǵyndary senimdi adamdy tańdaı alady.

Bul adam páter ıeleri bergen senimhat negizinde áreket etedi.