Qaraǵandy oblysynda qandaı jańa ónimder shyǵarylady

QARAǴANDY. QazAqparat – Qaraǵandy oblysy óz ónimderin álemniń 40 eline jetkizedi. Aldaǵy ýaqytta eksporttyq áleýet artýy múmkin. Sondyqtan keıbir taýarlardy shetelden ákelýdiń qajeti bolmaıdy, dep habarlaıdy QazAqparat tilshisi.

Jańa óndiristerdi qurý, ımportty almastyrý boıynsha 2022 jylǵa arnalǵan josparlar týraly Ónerkásip jáne ındýstrıaldy-ınnovatsııalyq damý basqarmasynyń basshysy Murat Qydyrǵanbekov baıandady.

- Oblys ónerkásibi turaqty damyp keledi. Bıylǵy jylǵa qandaı maqsattar qoıyldy?

- 2022 jylǵa ónerkásip óndirisi 2%-ǵa ósýmen 4,2 trln teńge deńgeıinde josparlanǵan. Investıtsııalar da oń dınamıka kórsetedi dep kútilýde – 835 mlrd teńge, ósim 2,8%. Olardyń negizgi úlesi jeke ınvestıtsııalarǵa keledi. 2025 jylǵa deıin 50 ınvestıtsııalyq jobany júzege asyrýdy josparlap otyrmyz. Bıyl 16 joba aıaqtalýy tıis, olar oblys turǵyndaryn 2200 jumys ornymen qamtamasyz ete alady.

- Jobalar týraly tolyǵyraq aıtyp berseńiz. Importty almastyrý boıynsha qandaı josparlaryńyz bar?

- Eń iri joblardyń biri – Balqash qalasyndaǵy qýaty 100 megavatt kún elektr stantsııasy, Qaz Carbon kompanııasynyń aglomeratsııalyq zaýyty, «Berkýt» SP» JShS ónerkásiptik jarylǵysh zattar shyǵaratyn zaýyty. YDD Corporation ferroqorytpa zaýytynda tórtinshi peshti iske qosý josparlanýda, bul onyń qýattylyǵyn arttyrady.

Jezqazǵanda jyl sońyna deıin «Qazaqmys» korporatsııasynyń tájirıbelik gıdrometallýrgııalyq zaýyty iske qosylady dep kútilýde. Bul jobany júzege asyrý jyldar boıy jınaqtalǵan mys balqytý qaldyqtaryn jańa tehnologııa boıynsha óńdeýge múmkindik beredi.

Saran qalasynda reseılik «Tatneft» kompanııasymen birlesip KamaTyresKZ shına shyǵaratyn zaýyt salynyp jatqanyn bilesizder. Jospar boıynsha osy jyldyń sońynda iske qosylady. Kásiporynnyń óndiristik qýaty birinshi kezeńde jylyna 3,5 mln dana dóńgelekti quraıdy. Myńnan astam jumys orny ashylady.

Saran qalasynda ornalasqan maılyqtar men qaǵaz súlgiler shyǵaratyn Sunpaper kompanııasynda da jaqsy jańalyqtar bar. Ónimder suranysqa ıe, tutynýshylar arasynda saýda úıleri, dámhanalar men meıramhanalar, qonaq úıler, iri kompanııalar bar. Kásiporyn qazir shıkizatty Reseıden jáne basqa elderden satyp alyp jatyr, endi ónimderdi óz kúshimen shyǵara bastaıdy. Bul jergilikti qamtýdy arttyryp, óndiristi keńeıtedi. Esepteýler boıynsha joba júzege asyrylǵannan keıin qýattylyq jylyna 21,4 myń tonna qaǵaz ónimine deıin ulǵaıady.

Oblysta taý-ken ónerkásibi úshin geomembrandar, metallýrgııa kásiporyndary úshin hımııalyq reagentter óndirisin jolǵa qoıý josparlanýda. Bul ımportty almastyratyn jáne eksportqa baǵyttalǵan ónimder.

- Oblystyń syrtqy saýda aınalymy artyp keledi. Eksport qurylymynda ne basym? Qaraǵandy ónimderin qaı elder satyp alady?

- Qaraǵandy oblysy ónerkásip ónimderin álemniń 40 eline eksporttaıdy. Jetkizýdiń eń kóp kólemi Reseı men Qytaıǵa tıesili. Basqa seriktester Ózbekstan, Ýkraına, Belarýs, Qyrǵyzstan, Evroodaq elderi.

Eksporttyń negizgi túrlerine qara jáne tústi metallýrgııa, qurylys ındýstrııasy, hımııa ónerkásibi, mashına jasaý, rezeńke jáne plastmassa buıymdary, kabel jáne sym buıymdary jatady.

Jańa óndiris oryndary iske qosylǵan saıyn oblystyń eksporttyq múmkindikteri de arta túsedi.

- Suhbatyńyzǵa rahmet!