Qaraǵandy oblysynda gazǵa qosylýǵa sýbsıdııa tólenedi

QARAǴANDY. QazAqparat – Qaraǵandy oblysynda áleýmettik jaǵdaıy tómen azamattarǵa gazǵa qosylýǵa kómektesedi. Kómekti azamattardyń áleýmettik osal sanattary ala alady. Ol úshin jergilikti bıýdjetten qarajat bólinedi, dep habarlaıdy QazAqparat tilshisi.

2021 jyldyń qazan aıynda Jezqazǵan, Temirtaý jáne Qaraǵandyda gaz taratý jelileri iske qosyldy. Salynǵan nysandar «QazTransGaz Aımaq» AQ senimgerlik basqarýyna ótti. Úsh qalada jeke sektordaǵy 2705 turǵyn úıge gaz tartyldy.

Gazdandyrý jumystary áli de jalǵasýda.

«Qaraǵandy men Temirtaýda ekinshi iske qosý kesheniniń qurylysy aıaqtalý satysynda. Jezqazǵanda 1-shi kezektegi ekinshi iske qosý kesheniniń salynǵan jelilerin «QazTransGaz Aımaq» AQ-ǵa senimgerlik basqarýǵa berý júrgizilýde. Úsh qala boıynsha úsh iske qosý kesheniniń qurylysy 2023 jyldyń birinshi toqsanynda aıaqtalady. Saran qalasynda gaz qubyryn tartý jumystary jalǵasýda», – dedi óńirdegi energetıka jáne TKSh basqarmasynyń basshysy Ulantaı Úsenov.

Onyń aıtýynsha, jyl sońyna deıin úsh qalada taǵy 4000 úıge gaz tartý josparlanǵan.

Shahtınsk qalasynda, Jańaarqa jáne Osakarovka kentterinde gazben jabdyqtaý jelileriniń qurylysyna sharttar jasaldy. Buqar jyraý jáne Shet aýdandaryn, Qarajal qalasynyń Jáırem kentin gazdandyrýǵa JSQ ázirlenýde.