Qaraǵandy oblysynda gaz jelileri qyzmet kórsetetin kompanııaǵa berilýde

QARAǴANDY. QazAqparat – Qaraǵandy oblysynda Jezqazǵan, Temirtaý jáne Qaraǵandyda 3 myńǵa jýyq tutynýshy «Saryarqa» magıstraldy gaz qubyrynan kógildir otyn alady. Salynǵan gaz jelileri qyzmet kórsetetin kompanııanyń senimdi basqarýyna ótedi. Osydan keıin tarıfti bekitýge ótinim beriledi, dep habarlaıdy QazAqparat tilshisi.

Óńirge jumys sapary barysynda UEM Tabıǵı monopolııalardy retteý komıtetiniń tóraǵasy Asan Darbaev gazdandyrý jónindegi jobany iske asyrý barysymen tanysty.

TMRK basshysyna gaz taratý pýnktileri kórsetildi.

Ol gaz qazirdiń ózinde jeke úılerge jetkizilgen oblys ortalyǵynyń Mıhaılovka aýdanynda bolyp qaıtty.

«Árıne, gaz bolǵany jaqsy. Biz otbasymyzben osy úıde 20 jylǵa jýyq ýaqyt turamyz, kómirmen jylytamyz. Qysta 5-6 tonna satyp alamyz. Gaz tıimdirek bolady. Biraq qazandyqty qoıý úshin úıdiń ishine qubyr salý – aıtarlyqtaı shyǵyndy talap etedi. Biz bólip-bólip tóleımiz dep úmittenemiz», – deıdi Zapadnyı kóshesi turǵyndarynyń biri, zeınetker Aman Ábjanov.

Energetıka jáne TKSh basqarmasynyń basshysy Ulantaı Úsenov Qaraǵandy, Temirtaý jáne Jezqazǵanda alǵashqy iske qosý kesheni aıaqtalǵanyn habarlady.

Úsh qalada 3 myńǵa jýyq abonent úılerine gaz jelileri tartyldy. Ekinshi kezektiń qurylysy júrgizilýde.

Óńirde «QazTransGaz Aımaq» AQ qyzmet kórsetý kompanııasy jumysqa kirisedi.

Ol Jezqazǵan men Temirtaýdaǵy gaz jelilerin senimgerlik basqarýǵa qabyldady.

Qaraǵandyda tapsyrý úrdisi aıaqtalyp qaldy. Kompanııanyń abonent bólimi ashyldy, onda gaz qosqysy keletinder tehnıkalyq sharttardy ala alady.

«Biz úlken jumys atqarylǵanyn kórip otyrmyz. Birinshi kezeń aıaqtalýǵa jaqyn. Tamyz aıynda bizdiń departamentke tarıfti bekitýge ótinim beriledi dep kútemiz. Aldyn ala kópshilik tyńdaýlar ótedi. Barlyq taraptardyń múddeleri eskeriletin bolady. Qazan aıynyń basyna deıin oblys boıynsha gazdyń túpkilikti quny anyqtalady dep oılaımyn», – dedi Asan Darbaev.

Qaraǵandy oblysyn gazdandyrý jobasy 2035 jylǵa deıin eseptelgen. Qaraǵandy boıynsha 30 myńǵa jýyq úıdi qamtıtyn 16 iske qosý kesheni josparlanǵan.

Temirtaýda segiz, Jezqazǵanda alty iske qosý kesheni qarastyrylǵan. Shahtınsk, Jańaarqa jáne Osakarov aýdandaryn gazdandyrý boıynsha jobalar ázirlendi.

Qarajal, Jáırem kenti, Buqar Jyraý jáne Shet aýdandary úshin JSQ jasalyp jatyr. Bıyl Saran qalasynda gaz qubyrynyń qurylysy bastalady.