Qaraǵandy oblysynda fermerlerdiń mal sany esepteletin boldy
14:36, 27 Qyrkúıek 2016
QARAǴANDY. QazAqparat - Qazan aıynda Qaraǵandy oblysynda «Maldy sanaý» jedel-aldyn alý sharasyn ótkizý josparlandy. Bul týraly óńirlik ІІD jergilikti polıtsııa qyzmeti habarlady.
«1 jáne 31 qazan aralyǵynda Qaraǵandy oblysynda jergilikti polıtsııa qyzmetiniń bastamasymen «Maldy sanaý» jedel-aldyn alý sharasy ótkiziledi. Maqsaty - mal urlyǵymen baılanysty qylmystardyń aldyn alý. Polıtsııa qyzmetkerlerimen birge jedel-aldyn alý sharasyna jergilikti atqarýshy organ jáne veterınarlyq qyzmet ókilderi qatysady», - delingen habarlamada.
Sharýa jáne fermerlik sharýashylyqtarda, úılerdiń qoralarynda mal sany esepteletini atalyp ótildi. Mal urlyǵy úshin sottalǵan azamattar tekseriledi. Sonymen qatar, qylmyskerler men jergilikti turǵylyqty orynsyz tulǵalardy izdeý úshin qystaqtardy tekserý kózdelgen.