Qaraǵandy oblysynda erekshe balalarǵa arnalǵan lager ashylady
Respýblıkalyq oqý-saýyqtyrý ortalyǵynyń tórtinshi fılıaly Balqash kóliniń jaǵalaýynda, burynǵy metallýrgterge arnalǵan sanatorıı-profılaktorııdiń aýmaǵynda ornalasatyn bolady.
«Býrabaıda 17 jyl buryn «Baldáýren» ROSO ashylǵan bolatyn. Ol nysan jyl boıy jumys isteıdi. Ortalyqta kópbalaly jáne az qamtylǵan otbasylardyń balalary men jetim balalar oqý baǵdarlamasynan qalmastan saýyǵyp, em alady. Búgingi tańda elimiz boıynsha bul ortalyqtyń úsh fılıaly qyzmet etedi. Endi mine tórtinshisi Qaraǵandy oblysynda Balqash jaǵalaýynda ashylǵaly jatyr. Alaıda bul saýyqtyrý nysany ınklıýzıvtiligimen erekshelenetin bolady. Ortalyqta erekshe bilim alý qajettilikteri bar balalarǵa teń múmkindikter beriledi. Mundaı joba birinshi bolyp Qaraǵandy oblysynda júzege asyrylyp jatyr», - dedi Qaraǵandy oblystyq máslıhatynyń depýtaty Aıman Túkbaeva.
Onyń aıtýynsha, jobany júzege asyrý ońaıǵa soqpaǵan. Metallýgterdiń burynǵy saýyqtyrý ornyn balalardyń demalys ortalyǵyna aınaldyrý úshin kóp kúsh jumsaýǵa týra keldi, deıdi depýtat.
«Men depýtat retinde osy máseleni kóterdim, qajetti mekemelerge saýaldar joldadym. Nátıjesinde korporatsııa nysandy balalarǵa syıǵa tartyp, múliktik keshendi aqysyz túrde QR Bilim jáne ǵylym mınıstrligine berdi. Bul rette oblys ákimi Erlan Qoshanovtyń kórsetken qoldaýy zor boldy. Biz sol úshin óńir basshysyna rızalyǵymyzdy bildiremiz», - dedi Aıman Túkbaeva.
Qazirgi tańda nysan jóndelip jatyr. Ortalyqtyń fılıaly 1 maýsymda ashylyp, balalardy qabyldaýǵa daıyn bolady dep josparlanǵan. Bir aýysymda lager 155 balany qabyldaıdy. Bıyl munda Qaraǵandy jáne Pavlodar oblystarynan 1 300-den astam bala demalady jáne densaýlyǵyn túzeıdi. Aldaǵy ýaqytta munda elimizdiń barlyq óńirinen balalar keledi dep josparlanýda.
Depýtat saýyqtyrý ortalyǵyn uıymdastyrýda barlyǵy egjeı-tegjeıli oılastyrylǵanyn atap ótti. Lagerde erekshe balalardy alyp keletin ata-analarǵa da tegin saýyǵý múmkindigin usyný qarastyrylýda. Balalarmen jumys isteý jáne qarym-qatynas qurý úshin eriktiler daıyndalady.
Buǵan qosa, áleýmettik jobany iske asyrýdyń arqasynda Balqashta jańa jumys oryndaryn ashýǵa múmkindik paıda bolady. Ortalyqta 200-ge jýyq pedagog, dáriger, qyzmet kórsetetin mamandardan quralǵan ujym jumys isteıtin bolady.
Erlan Qoshanov bul jobanyń áleýmettik mańyzdylyǵyn atap ótip, týyndaǵan máselelerdi sheshýde barynsha qoldaý kórsetýge ýáde berdi.