Qaraǵandy oblysynda «Eńbek» baǵdarlamasymen 30 myńǵa jýyq adam jumys tapty

QARAǴANDY. QazAqparat – Qaraǵandy oblysynda osy jyly keminde 70 myń adamdy jumyspen qamtý josparlanǵan. Onlaın rejıminde ótken apparat keńesinde «Eńbek» baǵdarlamasy baǵytynda qandaı jumystar atqarylǵany aıtyldy, dep habarlaıdy QazAqparat tilshisi.

«9 aıda «Eńbek» memlekettik baǵdarlamasy boıynsha jumyspen qamtý sharalarymen 32,6 myń adam qamtyldy, onyń ishinde 28 275-i jumysqa ornalastyryldy. Myńǵa jýyq jas azamat eńbek naryǵynda suranysqa ıe mamandyqtar boıynsha qysqa merzimdi oqytý kýrstaryna jiberildi, al túlekterdiń edáýir bóligi jumysqa ornalasty», – dep baıandady Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekova.

Ol jumys berýshiler qandaı mamandarǵa muqtaj ekenin naqtylady. Bul slesar-elektrıkter, gazelektrdánekerleýshiler, fıtnes-nusqaýshylar, mehanızatorlar, traktorshylar, ot jaǵýshylar, tárbıeshiniń kómekshileri, tiginshiler, massaj jasaýshy mamandar jáne taǵy basqalar.

Oblysta «Bastaý Bıznes» jobasy da suranysqa ıe. Kásipkerlik negizderine 1 745 adam oqytyldy. Túlekter shaǵyn nesıe nemese óz isin ashýǵa granttar aldy. Oblysta grant berýge qosymsha qarajat bólindi.

Myńǵa jýyq adam jastar tájirıbesine, alty myńnan astamy qoǵamdyq jumystarǵa jiberildi. 700-ge jýyq adam áleýmettik jumys oryndaryn aldy.

Oblys ákimi Jeńis Qasymbek jumyspen qamtý, jańa jumys oryndaryn ashý sharalarynyń tıimdiligin arttyrýdy tapsyrdy.