Qaraǵandy oblysynda «elektrondy baqtashy» paıda bolady

QARAǴANDY. QazAqparat – Qaraǵandy oblysynyń Jańaarqa aýdanynda «elektrondy baqtashy» júıesi engiziledi. Bul janýarlardyń qatysýymen bolatyn jazataıym oqıǵalardy azaıtýǵa kómektesedi, dep habarlaıdy QazAqparat tilshisi.

Pılottyq joba týraly onlaın rejımde ótken quqyq buzýshylyqtardyń aldyn alý jónindegi vedomstvoaralyq komıssııanyń otyrysynda aıtyldy.

Suraqtardyń basym bóligi jol qaýipsizdigine qatysty boldy.

Kóbinese apattar janýarlardyń jolǵa shyǵýyna baılanysty bolatyny aıtyldy. Respýblıkalyq trassalarda torly qorshaýlar ornatý jalǵasýda. Sondaı-aq, jaıylymdardy qaýipsiz joǵary kerneýli symmen qorshaý týraly sheshim qabyldandy.

Respýblıkalyq mańyzy bar jol ótetin eldi mekenderde jaıaý júrginshiler ótkelderin projektorlarmen jaryqtandyrý josparlanǵan. Jol belgilerin jol bóligine proektsııalaý júıesi túngi ýaqytta «zebrany» qaýipsiz etedi dep kútilýde.

Qaraǵandyda 2022 jyly 18 jylǵa jýyq jumys istep turǵan baǵdarshamdardy basqarý júıesin aýystyra bastaý josparlanýda.

Qaraǵandy-Temirtaý joly qosymsha jaryqtandyrylady. Shamdardy ornatý máselesi merdigerdiń joqtyǵynan týyndady. Osy kezeńde jaryq jabdyqtarynyń bir bóligi isten shyqty. Qazir shamdardyń 50% qalpyna keltirildi, qalǵandaryn jaqyn arada retke keltirý kózdelip otyr.

Polıtsııa departamentiniń bastyǵy Erlan Faızýllınniń aıtýynsha, jol qozǵalysy erejelerin buzýdy avtomatty túrde tirkeýge arnalǵan jańa apparattyq-baǵdarlamalyq keshender óz tıimdiligin kórsetti. Olar 1 qazanda oblystyń bes qalasynda ornatyldy. Tórt kún ishinde 14 myńnan astam quqyq buzýshylyq tirkeldi.

Oblys ákimi Jeńis Qasymbek beınebaqylaý kameralaryn qosymsha qarjylandyrýdy qarastyrýdy tapsyrdy. Óńir basshysy bul qadam avtokólik júrgizýshilerin tártipke keltiretinin atap ótti.