Qaraǵandy oblysynda Elbasynyń eńbek jolyna arnalǵan halyqaralyq konferentsııa ótti
Oblys ákimi Jeńis Qasymbektiń júrgizýimen munda onlaın rejımde dóńgelek ústel ótip, onda Elbasymen eńbek jolynda tize túıistirgen seriktesteri estelikterimen bólisti.
Aımaq basshysy alǵashqy sózinde: «Búgin biz Qazaqstan magnıtkasynyń – 60, Temirtaý qalasynyń – 75 jyldyǵy, sondaı-aq, Elordanyń mereıtoıymen tuspa-tus keletin elimizdiń Tuńǵysh Prezıdenti Nursultan Nazarbaevtyń mereıtoıy qarsańynda jınalyp otyrmyz. Bul merekelerdiń qaı-qaısy bolsyn egemen elimiz úshin asa mańyzdy. Sondyqtan da barshańyzdy shyn júrekten mereıli merekemen quttyqtaımyn.
Qazaqstandyqtarmen qatar munda Elbasynyń oqý-tájirıbe jınaý jolynda tabany tıgen Reseı men Ýkraına jerlerinen qosylyp otyrǵan azamattarǵa eselep alǵys bildiremin» –, dep atap ótti.
Budan ári J.Qasymbek búginde Tuńǵysh Prezıdenttiń ómirbaıanyn zerttep júrgen, Elbasynyń týǵan topyraǵy Shamalǵandaǵy «Atameken» tarıhı-mádenı ortalyǵynyń ǵylymı qyzmetkeri Qadyr Tileýbergenulyna sóz berdi. Ol Nursultan Nazarbaevtyń týǵan topyraǵy, ósken ortasy jáne týǵan jeri Shamalǵandaǵy Tuńǵysh Prezıdenttiń ómir jolynan syr shertetin «Atameken» jádigerlerinen tyń derekter usyndy.
Elbasynyń ómir jolynda Ýkraına, ondaǵy Dzerjınski ýchılışesiniń alatyn orny erekshe. Onda birge oqyǵan dostary men serikterin saǵynyshpen eske alyp otyratyny belgili. Kóshbasshymyzdy ýkraındyqtar qalaı eske alady eken? Sol maqsatta onlaın dóńgelek ústelge Ýkraınadaǵy Kamenskıı joǵary tehnıkaly ýchılışesiniń dırektory Vadım Neklese qosylyp, jalyndy sálemge toly ystyq lebizimen bólisti. Olar, atalǵan ýchılışe ujymy, kezinde munda Qazaqstannyń Tuńǵysh Prezıdenti Nursultan Nazarbaevtyń oqyǵanyn maqtanyshpen aıtatyndyqtaryn jetkizdi. Jáne qandaı estelikter qaldyrǵan sońyna Elbasy? Sol kezdiń ózinde daralyǵymen kózge túsken. Máselen, sol 1960 jyldardaǵy gazet qıyndysynda ýchılışede qazaq stýdentteri oqıtyny aıtylyp, Nursultan Nazarbaev esimi erekshe atalǵanyn jáne sýretimen berilgenin ári joǵary shákirtaqy alyp turǵany jazylǵanyn jetkizdi. Sonymen qatar munda Elbasymen birge Qabıdolla Sarekenov esimi men sýreti jarııalanǵanyn qurmetpen atady Vadım Vıktorovıch.
Aımaq basshysy budan keıin sózdi Qazaqstannyń eńbek sińirgen qaıratkeri, Qazaqstannyń alǵashqy Syrtqy ister mınıstri Tóleýtaı Súleımenovke usyndy. Ardager metalýrg hám memlekettik qyzmetshi Elbasy, Qabıdolla Sarekenov úsheýiniń Temirtaýda tanystyǵynan bastap, eń alǵash Domna peshinen shoıyndy qalaı aǵyzǵandaryn áńgimelep, qyzyqty estelikterdi qaperledi. «Biz úsheýimiz tanysqan kúnnen birge júrip-turdyq. Gornovoıshy-metalýrg qyzmetin birge bastap, jalynyna kúıip, jataqhanada birge jattyq. Qoǵamdyq qyzmetterge aralastyq, joǵary oqý ornynda da qatar oqydyq. Aramyzda Nursultan Ábishuly únemi alda júretin. Qarapaıym qyzmetshiden Prezıdent dárejesine kóterilgen ol kisiniń qaıraty men tabandylyǵy qaıtalanbaıtyn erlik» dedi ol sóz arasynda.
Qabıdolla Sarekenov te tańǵajaıyp syrlardy aqtardy. «Shoıyn balqytý úshin 100-den astam tsehy bar Qaraǵandy metalýrgııa zaýyty jumys istedi. Partkomnyń jap-jas hatshysy Nursultan Ábishuly jınalys ótkizedi. 1961 Helsınkige stýdent jastardyń festıvaline barǵanda, ol kisiniń juldyzy jana tústi. Kelisimen barlyq qyzmetkerlermen kezdesý ótkizip, sharýany urshyqsha ıirip áketti. Tehnıkalyq jumystardyń tamyryna qan júgirtý jaǵyna kóbirek mán berdi. Ár ýaqytta eńbek adamdaryna kóńil bóletin» dedi.
Bul kisilerden keıin Qazaqstan magnıtkasynyń ardageri, kezindegi ınjener-novator Edýard Mınıkes, Qazaqstan jáne Reseı memleket qaıratkeri, kezindegi kombınattyń jetekshisi, Temirtaý jurtshylyǵy úshin aty ańyzǵa aınalǵan Oleg Soskovets, QR Ulttyq akademııalyq kitaphanasynyń basshysy Nurhan Serkebaı, Qaraǵandy memlekettik tehnıkalyq ýnıversıtetiniń rektory Murat Ibatov, Qaraǵandy memlekettik ındýstrııa ýnıversıtetiniń rektory Baqyt Jáýtikov, «ArselorMıttal Temirtaý» AQ dırektorynyń mindetin atqarýshy Vadım Basın sóılep, Elbasynyń eńbektegi, memlekettik qyzmet jolyndaǵy qaıtalanbas tulǵasyn tilge tıek etti. Ásirese, Qaraǵandy memlekettik tehnıkalyq ýnıversıtetiniń rektory Murat Ibatov Elbasynyń eńbek jolyn ǵylymı saraptap, paıymdy pikir bildirdi.