Qaraǵandy oblysynda egin jınaý naýqany 1 qyrkúıekte bastalady

QARAǴANDY. QazAqparat - Qaraǵandy oblysynda keıbir ósimdik sharýashylyqtary astyq, kartop jáne kókónis jınaýǵa kiristi. Jappaı naýqan 1 qyrkúıekte bastalady, dep habarlaıdy QazAqparat.

Óńir ákimdiginiń resmı saıtynda málim etilgendeı, kúzgi dala jumystaryna daıyndyq máselesi apparat keńesinde qaraldy.

Aýyl sharýashylyǵy basqarmasynyń basshysy Asqar Sanaýbarovtyń aıtýynsha, jem daıyndaý aıaqtalýǵa jaqyn. Qazirdiń ózinde qajetti shóp qorynyń 90% jýyǵy bar. Sonymen qatar pishendeme daıyndaldy.

«Bıyl dándi daqyldardy jınaý alańy 920 myń ga, maıly daqyldar – 58,4 myń ga, kartop – 11 507 ga jáne kókónister – 1 436 ga quraıdy, astyqtyń ortasha ónimdiligi 8,6 ts/ga deńgeıinde kútilýde, barlyq qajetti tehnıka daıyn», – dedi Asqar Sanaýbarov.

Ósimdik ósirýshilerge tyńaıtqyshtardyń, tuqymdardyń, pestıtsıdterdiń qunyn, sýarmaly sýdy jetkizý shyǵyndaryn óteýge 4,8 mlrd teńge sýbsıdııa tólendi. Aýyl sharýashylyǵy kásiporyndary Agrarlyq nesıe korporatsııasy arqyly qarjylaı kómek aldy. Arzandatylǵan baǵamen dızel otyny bólindi.

Dándi daqyldardy jappaı jınaýdy 1–25 qyrkúıek aralyǵynda ótkizý josparlanyp otyr.

Kartopty jınaý 30 qyrkúıekke deıin aıaqtalýy tıis.

Oblys ákimi Jeńis Qasymbek azyq-túlik qaýipsizdigin qamtamasyz etý úshin turaqtandyrý qoryna kartop pen kókónisterdi ýaqytyly jınaý jáne otyrǵyzý jóninde tapsyrma berdi.

Foto: gov.kz