Qaraǵandy oblysynda densaýlyq saqtaý salasyn qarjylandyrý ulǵaıtylady

QARAǴANDY. QazAqparat – Qaraǵandy oblysynda bıyl densaýlyq saqtaý salasyna 93 mıllıard teńgeden astam qarjy bólinedi. Bul ótken jylmen salystyrǵanda 24%-ǵa artyq. Bólingen qarajattyń úshten bir bóligi 1 qyrkúıekten bastap jumys istep kele jatqan mindetti medıtsınalyq saqtandyrý júıesine arnalmaq, dep habarlaıdy QazAqparat tilshisi.

MÁMS júıesinde mektep medıtsınasyn sýbsıdııalaý qarastyrylǵan, konsýltatsııalyq-dıagnostıkalyq jáne ońaltý kómegin qarjylandyrý kólemi aıtarlyqtaı keńeıtildi. Qymbat zertteýlerge qol jetkizý 2 esege ósti.

Medıtsınalyq saqtandyrý júıesi tólemderdiń turaqtylyǵyna baılanysty. Memleket esebinen qarjylandyrylatyn jeńildik alatyn azamattar sanaty avtomatty túrde «saqtandyrylǵan» mártebesi berlidi. Jumys isteıtin qaraǵandylyqtar úshin jarnalardy jumys berýshiler aýdarady. Óńirimizdegi 90 myńǵa jýyq óz betinshe jumyspen aınalysýshylar úshin biryńǵaı jıyntyq tólem qarastyrylǵan - bul respýblıkalyq jáne oblystyq mańyzy bar qalalar úshin 1 AEK jáne qalǵan eldi mekender úshin 0,5 AEK.

«Biz Memlekettik kirister departamentimen birge kún saıyn, apta saıyn osy jarnalardyń aýdarylýyn tekseremiz. Ózin-ózi jumyspen qamtyǵandarǵa arnap biz biryńǵaı jıyntyq tólemdi tóleý termınaldaryn ornatamyz. Búgingi tańda halyqtyń basym bóligi, aýyldyq eldi mekenderdi qosa alǵanda, MÁMS qatysýshylary bolyp otyr», - dep túsindirdi Densaýlyq saqtaý basqarmasy basshysynyń orynbasary Gamal Toqsanbaev.

Esterińizge sala keteıik, 2020 jyldan bastap Qazaqstanda áleýmettik medıtsınalyq saqtandyrý mindetti boldy. MÁMS júıesimen el halqynyń 94,5% qamtýdy josparlap otyr, onyń 5%-y – derbes tóleýshiler. 1 sáýirge deıin eldiń barlyq turǵyndary óz mártebesin anyqtaýy tıis, sebebi sol arqyly sizdiń saqtandyrýyńyzdy memleket, jumys berýshi nemese ózińiz qarjylandyratynyńyz belgili bolady.