Qaraǵandy oblysynda dala órtin sóndirýge myńǵa jýyq adam jumyldyryldy

QARAǴANDY. QazAqparat – Qaraǵandy oblysynda dala órtteri sóndirilip jatyr. 7 shildedegi jaǵdaı boıynsha 24 órt oshaǵy baqylaýǵa alyndy. Onyń ishinde eki dala órti men 14 órt sóndirildi, dep habarlaıdy QazAqparat tilshisi.

Qaraǵandy oblysy TJD baspasóz qyzmetiniń málimetinshe, órtterdi sóndirýge myńǵa jýyq adam men 184 tehnıka jumyldyrylǵan.

Ulytaý aýdanyndaǵy Jangeldi jáne Aqtas aýyldyq okrýgterinde qutqarýshylar órtpen kúresýdi jalǵastyrýda. Tabıǵı apatty joıýǵa 370 adam men 45 tehnıka jumyldyryldy.

Órt sóndirý jumystary Sheńber jáne Amangeldi aýyldyq okrýgterinde de júrgizilip jatyr.

«6 shildede Jańaarqa aýdanynda eki, Aqtoǵaı jáne Shet aýdandarynda bir-birden dala órti tirkeldi», - dep habarlady TJD baspasóz qyzmeti.

Esterińizge sala keteıik, 1 shildeden beri Qaraǵandy oblysynyń Ulytaý aýdanynda qutqarýshylar men jergilikti atqarýshy organdar, erikti jasaqtar birneshe dala órtin sóndirip jatyr. 5 shildede Ulytaý aýdanynyń úsh eldi mekeninde tótenshe jaǵdaı jarııalandy.