Qaraǵandy oblysynda bos jatqan jerler tsıfrlyq júıege kóshirilmek
Jer – basty baılyǵymyz. Ony, ásirese bos jatqan jerlerdi el ıgiligine tıimdi paıdalaný – biregeı mindet. Osy maqsatpen Qaraǵandy oblysynyń jer qatynastary basqarmasy bos jatqan jerlerdi básekeli ortaǵa usynady. 2020 jyldyń I jartyjyldyǵynda paıdalanylmaı turǵan 440,1 myń gektar jer ıelerinen alynyp, olar qolynan is keletin azamattarǵa jalǵa berildi.
Onyń ishinde, 7,4 myń gektar – egistik, 1,7 myń gektar – shabyndyq, 422,3 myń gektar – jaıylymdar.
Jer kodeksinde jalǵa alýdyń 5 jylǵa deıingi qysqa jáne 49 jylǵa deıingi uzaq merzimderi qarastyrylǵan.
Aýyl sharýashylyǵymen aınalysatyn azamattar agrosektor salasyn tańdasa, mindetti túrde sharýa qojalyǵyn ashýy tıis. Tek, sonda ǵana, tıisti jer telimin shamamen 5 jyldan 49 jylǵa deıingi aralyqta jalǵa ala alady.
Sodan keıin, aýdan ákimdikterimen kelisimshart jasasyp, kásibin dóńgeletýdi bastaıdy. Jyl saıyn sol kelisimshart boıynsha jerdiń gektaryna eseptep, jer salyǵyn ýaqytyly tólep otyrýy tıis.
«Eger, jalǵa alýshy jerdi durys paıdalanbasa, salyq mólsheri 10 ese artady. Aldymen jer teliminiń ıesine eskertý jasalady. Odan soń arnaıy komıssııa kelip, tekseredi de, kemshilikterdi joıýǵa ýaqyt beredi. Al, munan da nátıje shyqpasa, jer memleket ıeligine qaıtarylady», – deıdi oblystyq jer qatynastary basqarmasynyń jerdi paıdalanýdy josparlaý jáne boljaý bóliminiń basshysy Aqmaral Muqasheva.
2020 jylǵa arnalǵan bosalqy jerlerdi, aýyl sharýashylyǵy alqaptaryn aınalymǵa tartý josparynyń oryndalýy osyndaı maqsat-mindetterdi qamtıdy.
«100 naqty qadam» – Ult josparynyń «Aýylsharýashylyq jerlerin tıimdi paıdalaný maqsatymen olardy naryqtyq aınalymǵa engizý» 35-qadamyna sáıkes, 2020 jyly oblys boıynsha bos jatqan jerlerden 643,2 myń gektar aýyl sharýashylyǵy alqaptaryn aınalymǵa tartý josparlanǵan.
Bıylǵy jyldyń 6 aıy ishinde oblystyq jospar 68,4% oryndalǵan.
Jospardyń oryndalýy – ár aýdanda ártúrli. Bul aýdannyń ózine tán tabıǵı yńǵaılylyqtaryna baılanysty. Máselen, Abaı aýdanynda 69% bolsa, Qarqaraly aýdanynda – 127%. Al, Ulytaý aýdanynda 92%-dy qurasa, Shet aýdanynda – 142%-ǵa teń. Jezqazǵan qalasynda 240%-ǵa jetse, Sátbaev qalasynda 100% bolyp otyr. Al, Balqash qalasynda 96%-dy quraǵan.
2020 jyldyń I jartyjyldyǵynda oblysta 103 sharýa/fermerlik qojalyq qurylǵan.