Qaraǵandy oblysynda bıyl 700-den astam kópbalaly otbasy baspanaly bolady

QARAǴANDY. QazAqparat – Bıyl Qaraǵandy oblysynda qansha jańa páter salynady jáne turǵyn úı kezegi qalaı jyljıdy ? Búgin selektorlyq rejımde ótken apparattyq jınalys barysynda osy baǵyttaǵy josparlardy júzege asyrý máselesi talqylandy, dep habarlaıdy QazAqparat.

«Birinshi toqsanda 7% ósimmen 130,2 myń sharshy metr turǵyn úı paıdalanýǵa berildi. Bul qarqyn saqtalýy tıis. Jyl sońyna deıin oblysta 630 myń sharshy metr turǵyn úı salý josparlanyp otyr - bul shamamen 5 600 páter. Bunyń 1 210 páteri turmysy tómen otbasylarǵa arnalǵan baspanalar»,- dep habarlady Qurylys, sáýlet jáne qala qurylysy basqarmasynyń basshysy Taıhan Qalmahanov.

«1 sáýirge deıingi málimetterge saı turǵyn úı kezeginde 1 919 kópbalaly otbasy tur. Osy sanat úshin páter satyp alýǵa respýblıkalyq bıýdjetten qomaqty qarajat bólindi. Bıyl 732 kópbalaly otbasyn turǵyn úımen qamtamasyz etý josparlanyp otyr, bul kezekti qysqartýǵa múmkindik beredi», - dedi Taıhan Qalmahanov.

Ol sondaı-aq nesıelik turǵyn úı jospary týraly aıtty. Osy baǵyt boıynsha oblysta jyl sońyna qaraı jalpy aýdany 55,5 myń sharshy metr 926 páter paıdalanýǵa berilýi tıis.

Qaraǵandy oblysynyń ákimi Jeńis Qasymbek turǵyn úı qurylysynyń qarqynyn tómendetpeýdi, ásirese onyń sapasyn baqylaýda ustaýdy tapsyrdy.

«Turǵyn úı kezegin qysqartý qajet, halyqtyń barlyq sanattary úshin qoljetimdi baspana salý kerek. Sapaly kólik qatynasy men azamattardyń ómir súrý jaılylyǵyn jaqsartý úshin jaqsy joldar qajet», - dedi oblys ákimi.