Qaraǵandy oblysynda bıyl 47 mektep jańǵyrtylady
Bilim basqarmasynyń basshysy Gúlsim Qojahmetova ótken jyldyń ózinde aýyl mektepterine 200-ge jýyq joǵary oqý oryndarynyń túlegi jumysqa ornalasqanyn habarlady. Bıylǵy jyldyń qorytyndysy qyrkúıektiń ortasyna qaraı shyǵady.
«Ásirese aýyldyq jerlerde pedagogtardyń tapshylyǵy máselesin sheshý boıynsha sharalar qabyldaý qajet. Óńirler ákimderiniń mindeti – jas mamandarǵa jaǵdaı jasaý. Joǵary oqý oryndarynyń túlekteri aýylǵa qaıtýy úshin birinshi kezekte turǵyn úı, turmystyq máselelerdi sheshý qajet. Búginde óńirde barlyq jóndeý jumystarymen 143 bilim berý nysany qamtylǵan. Oqý jyly bastalǵanǵa deıin barlyq jumystar aıaqtalýy tıis. «Bilimdi ult» sapaly bilim berý ulttyq jobasy aıasynda jumys júrgizilýde. 2025 jylǵa deıin qalalar men aýdan ortalyqtarynda 20-ǵa jýyq, sonyń ishinde apatty mektepterdiń ornyna mektep salý josparlanýda», – dep atap ótti Jeńis Qasymbek apparattyq keńeste.
Gúlsim Qojahmetova ulttyq jobany iske asyrý barysy týraly tolyǵyraq baıandady.
Onyń aıtýynsha, ótken jyly oblysta 61 mektep jańǵyrtyldy, bıyl 47 mektep paıdalanýǵa beriledi.
Qarajat kúrdeli jáne aǵymdaǵy jóndeýge, kitaphanalar men ashanalardy qaıta jabdyqtaýǵa, jıhazdy jańartýǵa, pándik kabınetterdi jaraqtandyrýǵa, qaýipsizdikti qamtamasyz etýge bólingen.
Óńirdegi búkil 410 mektepte beınebaqylaý kamerasy ornatylǵan. Inklıýzıvti bilim berý úshin jaǵdaı jasalyp jatyr.
Ótken oqý jylynda qaraǵandylyq oqýshylar halyqaralyq olımpıadalar men ǵylymı jarystarda ártúrli dárejedegi 42 medal jeńip aldy.
PISA testiniń nátıjesi boıynsha mekteptegi bilim sapasyn baǵalaý osy jyldyń jeltoqsan aıynda belgili bolady.
Ulttyq joba balabaqshalardyń, úıirmeler men sektsııalardyń qoljetimdiligin qamtamasyz etýdi, kolledjderde tegin kásiptik bilim alý múmkindigin de kózdeıdi.