Qaraǵandy oblysynda bir táýlikte 9 saıajaıdy ot sharpydy

QARAǴANDY. QazAqparat – Sáýirdiń 23-nen 24-ne qaraǵan túni Qaraǵandy men Temirtaý qalalarynyń mańynda ornalasqan 9 saıajaıda órt shyqqan. Zardap shekkender joq, dep habarlaıdy QazAqparat tilshisi.

23 sáýirde saǵat 15:52-de Qaraǵandydaǵy «Naýka» saıajaı úıinde órt shyqqany týraly habarlama kelip tústi.

Jalpy alańy 250 sharshy metrde saıajaı úıi, aǵash qorshaý, shóp pen qoqystyń janýy oryn alǵan. Zardap shekkender joq.

Órtti sóndirýge TJD bólimshesinen 8 maman men 2 tehnıka jumyldyrylǵan.

Sol kúni saǵat 17:23-te Temirtaýdaǵy Cheremýshkı jáne Alma saıajaılarynyń aýmaǵynda da órt shyqqany týraly habar tústi.

«8 saıajaı, onyń ishinde 4-i jumys istep turǵan, tórteýi ıesiz, aǵash qorshaýlar (700 lınııalyq metr), qurǵaq shóp pen jalpy alańy 5 ga qoqys órtendi. Órt 19:37-de oqshaýlanyp, 20:21-de joıyldy. Qaza bolǵandar men zardap shekkender joq. Órtti sóndirýge Qaraǵandy oblysy TJD órt sóndirý qyzmetinen 26 adam men 6 bólimshe jumyldyryldy», - dep málim etti Qaraǵandy oblystyq TJD baspasóz qyzmeti.

Aldyn ala boljam boıynsha, órttiń shyǵýyna ashyq ot kózi sebep bolǵan.

«Saıajaıda ot shyǵýyna kóbinde óshirmeı tastaǵan temeki tuqyly, sóndirilmegen órt jáne basqa da ashyq jalyn kózderi (shashlyq, barbekıý), janǵysh zattarmen jumys istegende qaýipsizdik erejelerin saqtamaý sebep bolady» deıdi órt sóndirýshiler.

Qaraǵandy oblysynyń TJD órt qaýpti kezeńde qaýipsizdik erejelerin saqtaý kerektigin eske salady.

Órttiń aldyn alý maqsatynda qutqarýshylar úgit-nasıhat jáne aldyn alý sharalaryn júrgizip jatyr.