Qaraǵandy oblysynda bilim berý platformalaryna qatysty qıyndyqtardyń sebebi aıtyldy

QARAǴANDY. QazAqparat - Qaraǵandy oblysy Bilim basqarmasynyń jedel jelisine oqý jylynyń basynan bastap 127 qońyraý kelip tústi. Barlyq ótinish bildirýshilerge qajetti kómek kórsetilip, olardyń suraqtaryna jaýap berildi. Bul týraly bilim basqarmasynyń basshysy Gúlsim Qojahmetova koronavırýs indeti kezindegi mádenıet jáne bilim berý mekemeleriniń jumysyna arnalǵan tikeleı efırde málim etti, dep habarlaıdy QazAqparat tilshisi.

Qaraǵandy oblysynyń bilim basqarmasynda qashyqtan oqytý formatyna kóshýge baılanysty úzdiksiz jedel jeli quryldy.

«Jeli jumys isteı bastaǵan ýaqyttan beri 127 qońyraý kelip tústi. Olardyń barlyǵy boıynsha túsiniktemeler berildi. Sheshilmeıtin máseleler joq dep aıtqym keledi. Qurmetti oqýshylardyń ata-analary, eger sizder qashyqtan bilim berýde qıyndyqtarǵa tap bolsańyzdar, bizge habarlasýlaryńyzdy suraımyn, biz sizderge mindetti túrde kómektesemiz

jáne sizben birge jaǵdaıdy sheshýge tyrysamyz», - deıdi Gúlsim Qojahmetova.

Qashyqtyqtan bilim berý, kezekshi synyptar, oqýshylardy kompıýterlik tehnıkamen qamtamasyz etý jáne t.b. boıynsha qońyraýlar qabyldanatyn telefon nómirleri: (8-7212) 25-25-02, 8-747-491-12-91.

Sondaı-aq, ol DarynOnline jáne Sdot.Bilimal bilim berý platformalarymen týyndaǵan problemalar qazirgi tańda sheshilip jatqany týraly aıtty. Ol aqaýlar 1 qyrkúıekte shamadan tys júkteme saldarynan paıda bolǵan.

«Qazir júıelerdiń jumysy qalpyna keltirilýde, aldymen olarǵa aýdandardy, sodan keıin qalalardy qosamyz. Bul shamadan tys júktemeniń ekinshi ret qaıtalanbaýynyń aldyn alý úshin qajet. Kelesi aptada platformalardyń durys jumysyn qalpyna keltirýge bolady dep

oılaımyn», - dedi Bilim basqarmasynyń basshysy.

Gúlsim Qojahmetovanyń aıtýynsha, mektep oqýshylarynyń partaǵa qaıta otyratyn naqty kúni áli belgisiz. Bul epıdemıologııalyq jaǵdaıǵa baılanysty bolady.

Qazirgi tańda sondaı-aq mádenıet mekemeleri birtindep ádettegi jumys rejımine oralýda.

Murajaılar men kitaphanalar ashyldy. Onda kelýshiler s any shekteýli bolýy múmkin, sonymen qatar áleýmettik qashyqtyq pen maska rejımin saqtaý qajet.

Teatrlar men kınoteatrlar áli de jabyq.