Qaraǵandy oblysynda bes myńnan astam turǵyn úı jylytý maýsymyna daıyn

QARAǴANDY. QazAqparat – Qaraǵandy oblysynda energostantsııalarda 18 qazandyq pen 10 týrbına jóndeldi. Bilim berý nysandarynyń 80%-nan astamy aldaǵy jylytý maýsymyna daıyn, dep habarlaıdy QazAqparat tilshisi.

«Jyl boıǵy kestege sáıkes energııa kózderindegi negizgi jabdyqtardy jóndeý jalǵasýda. Esepti kúnge deıin 44 qazandyq pen 26 týrbınanyń jyldyq jospary kezinde 18 qazandyq pen 10 týrbınada jóndeý aıaqtaldy», – dep habarlady energetıka jáne TKSh basqarmasy basshysynyń mindetin atqarýshy Nurjan Naqypbekov.

Onyń aıtýynsha, aldaǵy qysqa 426 qazandyq, 2114,2 km ınjenerlik jeliler, 1126 áleýmettik sala nysandary jáne 5598 turǵyn úı daıyndalady. Búgingi kúni qazandyq pen ınjenerlik jelilerdiń daıyndyǵy 70,7%-dy, turǵyn úıler men áleýmettik sala obektileriniń daıyndyǵy 74,8%-dy quraıdy.

Bilim basqarmasynyń basshysy Gúlsim Qojahmetovanyń aıtýynsha, vedomstvo mekemeleriniń 84%-ynyń daıyndyq aktileri bar, qalǵandaryn tamyz aıynyń ortasyna deıin alý kerek.

Kómir satyp alý da jalǵasýda. Óńirde barlyq jylytý maýsymyna stantsııalarǵa, qazandyqtarǵa jáne halyqtyń tutynýyna kerek qajettilikter shamamen 7,5 mln tonnany quraıdy.