Qaraǵandy oblysynda bes áleýmettik bastamany baqylaıtyn Qoǵamdyq keńes quryldy

QARAǴANDY. QazAqparat - Qaraǵandy oblysynda Elbasynyń bes áleýmettik bastamasynyń oryndalýyn baqylaıtyn Qoǵamdyq keńes quryldy, dep habarlaıdy óńir basshysynyń resmı saıty.

 Onyń quramyna partııalardyń, Qazaqstan halqy Assambleıasynyń, úkimettik emes uıymdarydyń jáne basqa da azamattyq qoǵam ınstıtýttarynyń ókilderi endi. Bul respýblıkamyzda qurylǵan birinshi aımaqtyq qoǵamdyq uıym. 

Keńestiń birinshi otyrysy beısenbi, 24 mamyrda «Nur Otan» partııasynyń oblystyq fılıalynda ótti. 

- Osy jyldyń eń mańyzdy sharalarynyń biri «Prezıdenttiń bes áleýmettik bastamasy» Joldaýy boldy. Ár bastama - bizdiń azamattardyń jaǵdaıyn jaqsartýǵa jasalatyn qadam, - dedi Qaraǵandy oblysynyń ákimi Erlan Qoshanov. - Bul qujat shyqqan sátten bastap Elbasy «Nur Otan» partııasyna osy áleýmettik bastamalardyń oryndalýyn baqylaýdy tapsyrdy. Qazaqstan halqy Assambleıasynyń sessııasynda Prezıdent «Nur Otan» partııasy Assambleıanyń qatysýymen áleýmettik bastamalardyń júzege asyrylýyna qoǵamdyq baqylaý jasaıtynyn atap aıtty». 



Qaraǵandy aımaqtyq keńesi tóraǵasy retinde oblystyq máslıhat depýtaty Serǵazy Ádekenov taǵaıyndaldy, hatshysy - «Nur Otan» partııasynyń oblystyq fılıalynyń saıası jumys bóliminiń meńgerýshisi Baǵyjan Sádirbekova. Keleshekte naqty baǵyttarmen aınalysatyn jumys toptary qurylatyn bolady. 

Oblysta qazirdiń ózinde árbir áleýmettik bastamalardy júzege asyrý boıynsha daıyndyq jumystary júrgizilip jatyr. Shaǵyn nesıeleýge 2018-shi jyly aımaqta 5,7 mlrd teńge qarastyrylǵan. Stýdentter qaýymy arasynda jataqhanaǵa muqtajdardyń qajettilikteri anyqtalǵan. Olardyń sany 2700 orynnan asady. Bıylǵy jyly kolledjderdiń jataqhanalaryna arnalyp úsh ǵımarat qaıta qalypqa keltiriledi. 2019-shy jyly 4 stýdenttik jataqhana salý josparlanyp otyr. 

Gazdandyrý jobasy - Qoǵamdyq keńes músheleriniń nazarynda. Sebebi gaz qubyrynyń basym bóligi Qaraǵandy oblysy arqyly ótedi. 

Gaz salasynyń ardageri Gennadıı Ovcharov «QaraǵandyOblGaz» mamandandyrylǵan kásipornyn qurýdy usyndy. Qaraǵandy oblysy kásipkerler qaýymdastyǵynyń prezıdenti Nıkolaı Abt gaz salasyna qajetti qurylǵylardy jasap shyǵara alatyn jergilikti zaýyttardyń múddelerin alǵa tartýǵa keńes berdi. 

- Biz sózden iske aýysyp, jeń túre kirisýdi bastadyq dep aıtýǵa bolady. Bizdiń aldymyzda qyrýar jumys tur. Búgin de kóptegen jaqsy paıdaly usynystar jasaldy. Olardy júzege asyra bastaımyz, - dep qorytyndylady Erlan Qoshanov. - Qoǵamdyq keńes tek Elbasy bastamalarynyń oryndalýyn ǵana baqylap qoımaıdy. Eń bastysy - barlyq kúshterdi biriktirý jáne ár baǵyttyń oryndalýyna jaýapty qurylymdarǵa naqty kómek kórsetý».