Qaraǵandy oblysynda Baıanaýylǵa qatynaıtyn jol jóndelip jatyr

QARAǴANDY. QazAqparat – Qaraǵandy oblysynda Qalqaman – Baıanaýyl – Úmitker – Botaqara respýblıkalyq trassasynyń bir bóligi jóndelip jatyr. Bul jol óńirdi Baıanaýyl kýrorttyq aımaǵymen baılanystyrady, dep habarlaıdy QazAqparat tilshisi.

«Jol-qurylysy maýsymynda mamandar jalpy uzyndyǵy 60 shaqyrym bolatyn Qalqaman – Baıanaýyl – Úmitker – Botaqara respýblıkalyq avtotrassasynyń bir bóligin jóndeýge kiristi. Jumystar Úmitker kentinen Botaqara kentine deıingi jol ýchaskesinde júrgizilip jatyr», - delingen «Qazavtojol» kompanııasy baspasóz qyzmetiniń habarlamasynda.

Qazirdiń ózinde 40 km-den astam jol retke keltirilgen. Jol beti salqyn qaıta óńdeý tehnologııasymen jańartyldy. Jańa sý ótkizgish qubyrlar ornatyldy. Jazǵy maýsymnyń sońyna deıin taǵy 20 shaqyrymdy jóndeý josparda.

Jumysqa 35-ten astam arnaıy tehnıka men 50-ge jýyq maman tartylǵan. Jóndeý jumystary tolyq aıaqtalǵannan keıin mamandar jol belgilerin ornatady.