Qaraǵandy oblysynda ázirlenip jatqan lańkestik týraly qylmystyq is jabyq rejimde qaralady

QARAǴANDY. QazAqparat - Qaraǵandyda ázirlenip jatqan terrorlyq akti týraly qylmystyq is boıynsha aldyn ala tyńdaý ótti, dep habarlady «QazAqparat» HAA tilshisi. «Basty sot talqylaýy jabyq rejimde ótedi», - dedi Qaraǵandy oblysy qylmystyq is jónindegi mamandandyrylǵan aýdanaralyq sotynyń sýdıasy Qaırat Qasymov.

Sheshim kýágerlerdiń qaýipsizdigin qamtamasyz etý maqsatynda qabyldandy. Basty sot talqylaýy 15 qarashada bastalady, dep habarlady sýdıa.

Sottalýshylar - Balqash óńiriniń 8 turǵyny. Úsheýi - birge týǵan aǵaıyndylar.  Olar QR QK 24-257-baptar, 1, 2, QR QK 255-babynyń 4-bóligi, QR QK 287-baby boıynsha  lańkestik top daıyndaǵany jáne onyń qyzmetine qatysqandary úshin aıyptalýda. Aldyn ala tyńdaýda sottalýshylardyń advokattary protsessýdaldyq kelisimder jasasý týraly qoldaýhat berdi.

Buǵan deıin QR UQK baspasóz qyzmetiniń habarlaýynsha, Balqashta jáne Qaraǵandy oblysy Gúlshat kentinde radıkaldyq top qyzmetiniń joly kesildi. Olar qoldan jasalǵan jarylǵysh zatty paıdalanyp, lańkestik akti josparlaǵan. 26 maýsymda Gúlshat kentinde ustaý operatsııasy kezinde lańkesterdiń biri ózin jaryp jiberip, alynǵan jaraqattan qaıtys boldy. 29 maýsymda Balqash qalalyq soty 5 er adamdy tutqyndady. Tergeý nusqasy boıynsha, 2016 jylǵy sáýirde dástúrli emes din ustanatyn Balqash turǵyny óz qalasynda Balqash qalasy men Gúlshat kentiniń turǵyndarynan lańkestik top qurǵan. Tergeý nátıjesine sáıkes aıyptalýshylar tizimi 8 adamǵa ulǵaıdy.