Qaraǵandy oblysynda azamattardyń saılaý quqyǵy qalaı saqtalady

QARAǴANDY. QazAqparat – Qaraǵandyda onlaın rejıminde azamattardyń saılaý quqyqtaryn saqtaý máseleleri boıynsha semınar-keńes ótkizildi. Іs-shara aldaǵy aýyl ákimderin tikeleı saılaýǵa baılanysty uıymdastyryldy. Bul týraly Qaraǵandy oblystyq sotynyń baspasóz qyzmeti málim etti, dep habarlaıdy QazAqparat tilshisi.

Keńestiń bastamashylary - oblystyq sot pen óńirdiń prokýratýrasy.

Beınekonferentsbaılanys arqyly qalalar men aýdandardyń ákimderi, sýdıalar men prokýrorlar, quqyq qorǵaý organdarynyń ókilderi, aýmaqtyq jáne ýchaskelik saılaý komıssııalarynyń músheleri qatysty.

«Saılaý týraly zańnama jetildirildi. Azamattar aýyl, kent, aýyldyq okrýg ákimderin ózderi tańdaýǵa múmkindik aldy. Sot júıesi bul ózgeristerge ýaqtyly jaýap berdi. 1 shildeden bastap Ákimshilik rásimdik-protsessýaldyq kodeks kúshine endi, ol sotta janjaldardy qaraýdyń jańa tártibin engizdi», – dep atap ótti oblystyq sottyń ákimshilik ister jónindegi sot alqasynyń tóraǵasy Murat Týǵanbaev.

Onlaın-kezdesýde «Saılaý týraly» QR Konstıtýtsııalyq zańynyń negizgi erejeleri, sondaı-aq saılaý quqyqtaryn qorǵaý týraly isterdi qaraýdyń erekshelikteri túsindirildi.

Saılaý komıssııalarynyń saılaýdy ótkizýge daıyndyǵy týraly Qaraǵandy oblysy ákimi apparatynyń basshysy Daýlat Eshkeev baıandady.

Qaraǵandy oblysynda aýyl ákimderiniń alǵashqy tikeleı saılaýy 25 shildede ótedi. Ol 149 eldi mekende uıymdastyrylady. 75 aýyl ákimin saılaý qajet.

268 kandıdat tirkelgen, onyń ishinde 81 – saıası partııalardan, 187 – ózin-ózi usynýshylardan.

Bolashaq aýyl basshysyna 81 myńnan astam saılaýshy daýys bere alady. Saılaýdy ótkizýge 164 saılaý komıssııasy – 15 aýmaqtyq jáne 149 ýchaskelik komıssııa jumyldyrylady.