Qaraǵandy oblysynda az qamtylǵan otbasyndaǵy balalarǵa áleýmettik paketter berildi

QARAǴANDY. QazAqparat – Qaraǵandy oblysy elimizdegi eń alǵashqylardyń biri bolyp turmysy tómen otbasylarynyń balalary úshin kepildendirilgen áleýmettik paketter bere bastady. Naýryz aıynyń basynda Jańaarqa aýdanynda 200 balaǵa osyndaı kómek kórsetildi, dep habarlaıdy QazAqparat tilshisi.

Jańaarqa aýdany ákimdiginiń jumyspen qamtý jáne áleýmettik baǵdarlamalar bólimi mamandarynyń aıtýynsha, bıylǵy jyly 197 otbasynyń 6 jasqa deıingi 200 balasy qosymsha azyq-túlik jáne turmystyq hımııa ónimderimen qamtamasyz etiledi.

Dınara Bıjanova – kóp balaly ana. Ol jubaıymen birge jeti bala tárbıelep otyr.

«Búgin men áleýmettik paket aldym. Onda balalarǵa qajetti barlyq nárse bar: jarma, botqa, úlpek, pıýre, sút jáne t.b. Bul kóp balaly otbasylarǵa úlken kómek dep esepteımin», - deıdi Dınara Bıjanova.

Azyq-túlik jıyntyǵy óz quramy boıynsha balalardyń jas sanatyna baılanysty ǵana erekshelenedi (1-den 3 jasqa deıin jáne 3-ten 6 jasqa deıin), al onyń quramy barlyq aımaqtar úshin birdeı.

Kepildi áleýmettik paketter ataýly áleýmettik kómek alatyn otbasylarǵa ǵana beriledi.