Qaraǵandy oblysynda aýyr qylmys jasaǵan adam medıtsına mekemesinen qashyp ketti

ASTANA. QazAqparat – Qaraǵandy oblysynda polıtsııa aýyr qylmys jasaǵan qylmyskerdi izdestirip jatyr, dep habarlaıdy QazAqparat Polisia.kz saıtyna silteme jasap.

«Qaraǵandy oblystyq Polıtsııa departamentiniń qyzmetkerleri shilde aıynyń 18-ne qaraǵan túni medıtsına mekemesinen qashyp ketken sottalǵan azamattyń mekenjaıyn anyqtaý jáne ustaý boıynsha keshendi is-sharalar júrgizip jatyr. 35 jastaǵy Batys Qazaqstan oblysynyń týmasy aýyr qylmys jasaǵany úshin sottalǵan. Azamattyń qashyp ketý deregi boıynsha Qaraǵandy polıtsııasy garnızonynyń jeke quramyna habarlandy»,-delingen polıtsııanyń aqparatynda.

Qashqynnyń syrt belgileri: tolyq deneli, boıy 165 sm, shashy qara. Ústinde aq fýtbolka, qara aıaq kıim, qara shalbar jáne basynda qara kepka bolǵan.

«Qala turǵyndarynan sıpattalǵan adamǵa uqsas azamatty kórgender bolsa 102 telefonyna habarlasýlaryńyzdy suraımyz. Polıtsııa oblys turǵyndarynan ótkizilip jatqan is-sharalarǵa túsinistikpen qaraýlaryn suraıdy»,dep málime etti polıtsııadan.