Qaraǵandy oblysynda aýyl ákimderin saılaý qalaı ótýde

QARAǴANDY. QazAqparat – Qaraǵandy oblysynda aýyl ákimderin saılaý 13 aýylda, 17 kentte jáne 45 aýyldyq okrýgte 149 saılaý ýchaskesinde ótýde. Tańǵy saǵat 10-daǵy jaǵdaı boıynsha saılaýshylardyń 9% daýys berdi. Bul týraly Óńirlik kommýnıkatsııalar qyzmeti alańynda ótken brıfıngte oblystyq saılaý komıssııasy tóraǵasynyń orynbasary Mádına Apıeva aıtyp berdi, dep habarlaıdy QazAqparat tilshisi.

«Saılaý kezeńinde barlyǵy aýyl ákimdigine 303 kandıdat usynylyp, 257 kandıdat tirkeldi», - dep atap ótti Mádına Apıeva.

Barlyq saılaý ýchaskelerinde Ortalyq saılaý komıssııasy qaýlysymen bekitilgen nusqaýlyqtarǵa sáıkes daýys berýge arnalǵan úı-jaılar jabdyqtalǵan. Barlyq saılaý ýchaskelerinde kandıdattar týraly aqparattyq plakattar ornalastyrylǵan, komıssııa quramy týraly qajetti aqparattar keltirilgen stendter resimdelip, telefondary kórsetilgen.

Sondaı-aq erekshe qajettilikteri bar saılaýshylar úshin barlyq jaǵdaı jasalǵan.

Búgingi tańda saılaýshylar tiziminde 80 myńnan astam azamat bar. Saılaý komıssııalarynyń quramynda 952 múshe tirkelgen.

Saılaýshylardyń saılaý ýchaskelerine kelýi týraly aqparat aýmaqtyq saılaý komıssııalarynyń ınternet-paraqshalarynda, sondaı-aq oblystyq saılaý komıssııasynyń saıtynda, «saılaý» bóliminde usynylǵan jáne ol árbir eki saǵat saıyn jańartylyp otyrady.