Qaraǵandy oblysynda aýqymdy turǵyn úı qurylysy júrip jatyr

QARAǴANDY. QazAqparat - Qaraǵandy oblysy Buqar Jyraý aýdanynyń ákimdigi turǵyn úı jetispeýshiligi máselesin sheship jatyr, dep habarlaıdy QazAqparat.

Ol úshin Botaqarada úlken qurylys alańy ashyldy. Jyl sońyna qaraı aýdan ortalyǵynda «Jastar» shaǵyn aýdany paıda bolady. Munda «Nurly jer» baǵdarlamasy boıynsha birden 120 páterlik eki qabatty toǵyz úı salynýda.

Qaraǵandy oblysynyń ákimi Jeńis Qasymbekke Buqar Jyraý aýdanyna jumys sapary barysynda turǵyn úı sektoryn damytý áleýeti týraly aıtyldy.

- Abattandyrýdan keıin bul aýdan kenttiń eń zamanaýı jáne jaıly aýdandarynyń biri bolady. Mundaǵy 120 páter halyqtyń áleýmettik osal toptarynan turatyn otbasylarǵa arnalǵan, - dedi Buqar Jyraý aýdany ákiminiń orynbasary Sapar Sataev. - Jeltoqsan aıynda jańa qonystanýshylarǵa páter kiltin berýdi josparlap otyrmyz.

Aýdanda turǵyn úı kezeginde barlyǵy 938 adam tur. Jergilikti bılik aldaǵy jyldarǵa basym mindetterdiń qataryna múmkindiginshe kóp otbasylardy páterlermen qamtamasyz etýdi qoıyp otyr.

Sondyqtan Buqar Jyraý aýdanynda bolashaq «Jastar» shaǵyn aýdanyna uqsas úıler salý josparlanyp otyr.

Sondaı-aq, qazir ortalyqta 36 páterli úı jáne Úshtóbe aýylynda 54 kópbalaly otbasyna arnalǵan taǵy bir jalǵa beriletin úı salynýda. Jyl sońyna qaraı kezekte turǵan 240 otbasy jańa páterlerge kóshýi tıis.

Jeńis Qasymbek qurylys sapasyna erekshe nazar aýdardy.

- Eger halyqtyń áleýmettik osal toptary úshin turǵyn úı salsańyzdar, onda bir jerde aqaýlar jibere salýǵa bolady dep oılamańyzdar! Mundaı jaǵdaıda erekshe tekserýler bolady, - dep qorytyndylady aımaq basshysy.

Sonymen qatar, Doskeı aýylynda 90-shy jyldary bos qalǵan bes qabatty ǵımarat qalpyna keltirildi. 40 páterlik úıdi bıyl aıaqtaý josparlanyp otyr. Kentte barlyǵy toǵyz úı qalypqa keltirilýi tıis. Oblys ákimi jóndeý jumystaryn jalǵastyrýdy tapsyrdy.

- Jaqsy ıdeıa! Bul jóndeý bıýdjet úshin sonshalyqty qymbat emes. Jumysty jalǵastyra berińizder, - dep tapsyrdy Jeńis Qasymbek.

Al ázirge Buqar Jyraý aýdanynyń turǵyndary kópten kútken páter kiltterin kútip otyrǵanda, Botaqara kentinde jumys isteýge kelgen jas dárigerler baspanalaryn aldy. Aýdandyq ortalyq aýrýhananyń jas mamandary úshin arnaıy tórt páterli úı salyndy.

- Páter jaqsy. Maǵan óte unady. Endi osynda turyp, jumys isteý maǵan erekshe unaıdy, - dep atap ótti jas akýsher-gınekolog Zańǵar Esanpaev.

Jeńis Qasymbek sondaı-aq «Aýyl - El besigi», «Jumyspen qamtýdyń jol kartasy» baǵdarlamalaryn iske asyrý, sondaı-aq áleýmettik nysandar qurylysy boıynsha jumystardyń qalaı júrgizilip jatqanyn tekserdi. Mysaly, Botaqara kentinde 320 oryndyq dene shynyqtyrý-saýyqtyrý kesheniniń qurylysy bastaldy. Aıaqtalý merzimi - 2021 jyldyń kúzi.

Sondaı-aq, oblys ákimi aýdan basshysy Shaǵýrashıd Mamalınovtyń Buqar Jyraý aýdanynyń áleýmettik-ekonomıkalyq damýy týraly esebin tyńdady.