Qaraǵandy oblysynda aýdandyq máslıhat depýtaty eki balany qaǵyp ketti

Qaraǵandy. QazAqparat – Amanat partııasynyń Qaraǵandy oblysy Buqar Jyraý aýdany boıynsha fılıalynyń tóraǵasy, aýdandyq máslıhat depýtaty Anar Bozaeva jol apatyna ushyrady. Jol apaty saldarynan kámeletke tolmaǵan eki bala zardap shekti, dep habarlaıdy QazAqparat tilshisi.

Oqıǵa keshe, 2 shildede Qaraǵandy oblysynyń Buqar Jyraý aýdanynda, «Botaqara-Doskeı» tasjolynda boldy.

Kýágerlerdiń aıtýynsha, kólik tizgininde Amanat partııasynyń Qaraǵandy oblysy Buqar Jyraý aýdany boıynsha fılıalynyń tóraǵasy, aýdandyq máslıhat depýtaty Anar Bozaeva bolǵan.

«Qazirgi ýaqytta ol demalysta. Júrgizýshiniń tájirıbesi bar ekeni jáne kólik apaty kezinde mas bolmaǵany anyqtaldy. Qazirgi ýaqytta polıtsııa departamenti jol apaty faktisi boıynsha tergeý júrgizip jatyr, onyń nátıjeleri boıynsha barlyq kináliler zańda kózdelgen jazaǵa tartylady», - dep habarlady AMANAT partııasynyń Qaraǵandy oblystyq fılıalynan.

Polıtsııa departamentinen málimdegendeı, 33 jastaǵy áıel júrgizýshi joldan ótip bara jatqan malǵa soǵylǵan. Osydan keıin júrgizýshi rýldi basqara almaı, mototsıkldi qaǵyp ketken. Onda 8 jáne 16 jastaǵy kámeletke tolmaǵan eki bala bolǵan.

«Apat saldarynan jasóspirimder jaraqat alyp, medıtsınalyq mekemege jatqyzyldy. Bul fakt polıtsııada tirkelgen. Tıisti saraptamalar taǵaıyndaldy. Sotqa deıingi tolyq jáne obektıvti tergeý júrgizilýde», - dep habarlady Qaraǵandy oblysy PD baspasóz qyzmeti.