Qaraǵandy oblysynda Ahmet Baıtursynuly sabaq bergen mektep jóndelip jatyr
Bir qabatty aǵash ǵımarat qashan salynǵanyn eshkim dál aıta almaıdy. Aýdandyq mádenıet bóliminiń qyzmetkerleri mundaı derekterdi ne oblys, ne Almaty muraǵattarynan taba almady. Mamandar ǵımarat XIX ǵasyrdyń sońynda salynǵan dep boljaıdy. A. Baıtursynulynyń sol jerde sabaq bergeni ǵalym Aqjan Mashanovtyń eńbekterinde jazylǵan jáne ǵımarattyń mandaıshasyndaǵy eski taqtaısha sony aıǵaqtaıdy. Jazbalarǵa sáıkes, aǵartýshy bul mektepte 1904 - 1909 jyldar aralyǵynda jumys jasaǵan.
«Ǵımarat óte eski. Bir kezderi mektep bolǵan, al 90-shy jyldary baılanys bólimshesi men taý-ken baıytý kombınatynyń sharýashylyq keńsesi ornalasqan. Sodan keıin biraz ýaqyt ol bos qalyp, eskirdi», – deıdi Qarqaraly aýdany mádenıet jáne tilderdi damytý bóliminiń mamany Dana Álıeva.
Aýyldyń qarııalary ǵımaratty tolyǵymen qırap qalýdan qutqarǵan. 2007 jyly «Jibek joly» baǵdarlamasynyń arqasynda ol qalpyna keltirilip, dýalmen qorshaldy. Jóndeý jumystary 2008 jyly jalǵasty, sodan keıin ǵımarattyń bir bóligi kitaphanaǵa berildi, al ekinshisinde shaǵyn ortalyq ashyldy.
«Qazir ǵımarat memlekettiń qorǵaýynda. Aǵymdaǵy jóndeýge qarajat bólindi. Biz nysannyń alǵashqy kúıin saqtap, balalarǵa qolaıly jaǵdaı jasaýǵa barynsha tyrysamyz. Ǵalymnyń synybynda onyń týǵan-týystaryna jazǵan hattary saqtalatyn bolady. Sýretshiler Ahmet Baıtursynulynyń 3D-portretin salady. Kire beriste zamanaýı taqtaıshalar ornatylyp, kitaphanadaǵy kitap sóreleri jańartylady», – deıdi Dana Álıeva.
Bıyl 5 qyrkúıekte lıngvıst-ǵalym, ádebıettanýshy, túrkitanýshy, aqyn, aýdarmashy jáne qoǵam qaıratkeri Ahmet Baıtursynulynyń týǵanyna 150 jyl tolady. Bul kúni jańartylǵan ǵımarattyń ashylýy da josparlanyp otyr. Mereıtoı kúnine oraı konferentsııalar men túrli tanymdyq is-sharalar uıymdastyrylady.