Qaraǵandy oblysynda 9 qala men 100-den astam eldi mekenge gaz beriledi

NUR-SULTAN. QazAqparat - Qaraǵandy oblysynyń 9 qalasy men 114 eldi mekeni kógildir otynǵa qol jetkizedi. Bul týraly oblys ákimi Jeńis Qasymbek málim etti, dep habarlaıdy QazAqparat tilshisi.

«Oblystaǵy 9 qala men 114 eldi meken gazǵa qosylady. Qaraǵandy, Temirtaý jáne Jezqazǵan qalalaryna gaz tartý keshenderiniń qurylysy aıaqtalady. Jeliler «QazTransGaz Aımaq» AQ-ǵa berilgennen jáne tarıf bekitilgennen keıin, ıaǵnı 2021 jyly gaz beriledi. Kógildir otyn 3 872 jeke turǵyn úıge qosylady. Odan bólek, qarjylyq qoldaýdyń arqasynda Jańaarqa, Osakarov aýdandary men Saran, Shahtınsk qalalarynda gazben jabdyqtaý jelilerin salý josparlanyp otyr», - dedi J. Qasymbek OKQ-de onlaın ótken baspasóz máslıhatynda.

Oblys basshysynyń aıtýynsha, gazdandyrý aımaq ekologııasyn jaqsartýda oń septigin tıgizedi.

«ArselorMıttal Temirtaý» jáne «Qazaqmys» keıbir kásiporyndaryn gazǵa kóshirý josparlanýda. Sondaı-aq, ekologııa máselesin tıimdi sheshý jolynda ónerkásip kásiporyndarynyń qaldyq deńgeıin tómendetý men kógaldandyrý sharalary basty nazarda. Jalpy qorshaǵan ortany qorǵaý bizdiń óńir úshin asa qajet, ásirese Temirtaý, Balqash jáne Jezqazǵan aımaqtary úshin. Josparǵa sáıkes, aldaǵy 3 jylda atmosferany lastaý deńgeıi 30%-ǵa azaıýy tıis», - deıdi ol.

Buǵan deıin habarlaǵanymyzdaı, J. Qasymbek bıylǵy 10 aıda Qaraǵandy oblysyna 530 mlrd teńge ınvestıtsııa tartylǵanyn málim etken bolatyn.