Qaraǵandy oblysynda 80-nen astam aqbókenniń óleksesi tabyldy

QARAǴANDY. QazAqparat - Qaraǵandy oblysynda Qaınar aýyldyq okrýginiń turǵyndary Qulan ózeniniń jaǵasynan seksennen astam aqbókenniń óleksesin tapty, dep habarlaıdy QazAqparat tilshisi.

Oqıǵa ótken juma, 23 maýsymda Qaraǵandy oblysy Nura aýdany Qaınar aýyldyq okrýginde bolǵan. Jergilikti turǵynnyń biri Qulan ózeninen aqbókenderdiń óleksesin kórgen. Sol kúni keshke Qaraǵandy oblystyq orman sharýashylyǵy jáne janýarlar dúnıesi aýmaqtyq ınspektsııasynyń mamandary keldi. Belgili bolǵandaı, ózende 86 aqbókenniń bıylǵy tóli sýǵa batyp ketken.

«23 maýsymda Qulan ózeninde sýda 86 bas aqbóken tólderiniń óleksesi tabyldy. Komıssııa quramynda: Qaraǵandy oblystyq orman sharýashylyǵy jáne janýarlar dúnıesi aýmaqtyq ınspektsııasynyń, Nura aýdanynyń tabıǵatty qorǵaý polıtsııasynyń, «Ohotzooprom» RMQK, kenttiń veterınarııalyq ınspektsııasy jáne Qaınar aýyldyq okrýgi ákimdiginiń qyzmetkerleri tekserý júrgizdi. Ólgen janýarlardyń óleksesinde ydyraý izderi bar, bul olardyń jynysyn, oq tıgen-tımegenin anyqtaýǵa múmkindik bermedi (qylmystyq izder joq)», - dep málimdedi ETRM orman sharýashylyǵy jáne janýarlar dúnıesi komıtetiniń Qaraǵandy oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Abzal Baltabaev.

Mamandar aqbókenderdiń óleksesin arnaıy polıgonǵa shyǵaryp, joıyp jiberdi. Boljam boıynsha, olardyń jappaı qyrylýyna jas aqbókenderdiń ózendegi ótkelden óte almaýy sebep bolǵan. Inspektsııa habarlaǵandaı, bul ýchaskede sý astynda tereń jar bar.

«Sýǵa batyp ketken tólder tym jas bolǵandyqtan ótkelden júzip óte almaǵan bolýy múmkin», - deıdi mamandar.