Qaraǵandy oblysynda 76 myńnan astam adamǵa azyq-túlik sebeti beriledi

QARAǴANDY. QazAqparat – Qaraǵandylyqtardy bılik ókilderi azyq-túlik sebetine qatysty dúrlikpeýge shaqyrýda. Bul memlekettik kómek barlyq tıesili azamattarǵa beriledi. Bul týraly brıfıng barysynda oblys ákiminiń orynbasary Abzal Núkenov málim etti, dep habarlaıdy óńirlik ákimdiktiń baspasóz qyzmeti.

Atalmysh memlekettik kómekti alý úshin eshqaıda barýdyń qajeti joq - tizimder proaktıvti formatta jasalǵan. Azyq-túlik — turmystyq sebettiń ornyna alýshylardyń jeke shottaryna aqsha aýdarylady.

«Naýryz aıynda azyq-túlik - turmystyq jıyntyqtarǵa 35,1 mln. teńgege 6 316 balaǵa (6 jastan 18 jasqa deıin) aqshalaı tólem jasaldy. TJ rejımi kezeńinde alýshylar sanaty keńeıdi. Sáýir aıynda 427 mln teńgege 76 myńnan astam adam azyq-túlik - turmystyq jıyntyqtarmen qamtamasyz etiledi. Onyń 18,5 myńnan astamy kómek alyp úlgerdi. Qalǵan aqsha jaqyn arada jeke shottarǵa aýdarylady. Dúrlikpeńizder. Barlyq kómek alýshylar tizimi bizge belgili. Másele tehnıkalyq jaǵdaıǵa baılanysty bolyp otyr», - dedi Abzal Núkenov.

Ákim orynbasary ataýly áleýmettik kómekti ekinshi toqsanǵa da avtomatty túrde uzartatynyn eske saldy. Memleket tarapynan kómek alýshylarǵa eshqandaı qujattar tapsyrýdyń qajeti joq.

2020 jyly Qaraǵandy oblysynda AÁK tóleýge 3,7 mlrd teńge qarastyrylǵan. Naýryz aıynda ony 3 677 otbasy aldy. Bul shamamen 18 myń adam.

Budan basqa, bir jastan 6 jasqa deıingi balalary bar AÁK alýshylarǵa da kepildendirilgen áleýmettik paket beriledi. Búgingi tańda atalmysh kómek túrin 2 330 otbasy aldy.

Abzal Núkenov muqtajdarǵa kómek kórsetkeni úshin metsenattar men eriktilerge alǵysyn bildirdi.

- Osy bir qıyn ýaqytta adamdar uıymdasyp jatyr. Jaqsy isterdiń mysaldary kóp. Otandastarymyzdyń arasynda janashyr jandar kóp ekeni kóńilge qýanysh uıalatady, - dep atap ótti oblys ákiminiń orynbasary.

Birgemiz qorynan muqtajdarǵa 50 myń teńgeden tólenedi. Materıaldyq kómek alý úshin Nur Otan partııa fılıaldaryna habarlasý kerek.

TJ kezeńinde azyq-túlik - turmystyq jıyntyǵy kimge tıesili (QR eńbek jáne halyqty áleýmettik qorǵaý mınıstriniń buıryǵyna sáıkes 2 AEK kem emes aqshalaı tólem túrinde):

- AÁK alýshylar otbasylaryndaǵy 6 jastan 18 jasqa deıingi balalar;

- barlyq jastaǵy I, II jáne III toptaǵy múgedekter,

- múgedek balalar,

- múgedek balany kútýmen aınalysatyn ata-analar;

- resmı tirkelgen jumyssyzdar.