Qaraǵandy oblysynda 75 aýyldyń ákimi saılandy, onyń úsheýi - áıelder

QARAǴANDY. QazAqparat – Qaraǵandy oblysynda aýyldyq eldi mekender ákimin saılaýǵa 257 kandıdat qatysty, dep habarlaıdy QazAqparat tilshisi.

Oblystyq saılaý komıssııasynyń tóraǵasy Erqara Aımaǵambetov óńirlik kommýnıkatsııalar qyzmetinde ótken brıfıng barysynda tikeleı saılaý qorytyndysy týraly aıtyp berdi.

Aýyl ákimderin saılaý 149 eldi mekenniń 75 saılaý okrýginde ótti.

257 kandıdattyń 79-yn saıası partııalar usyndy: NurOtan – 61, «Aýyl» HDPP – 3, «Aq Jol» QDP – 3, «ADAL» SP – 3 jáne QHP - 9 kandıdat.

Qalǵan 178 kandıdat - ózin-ózi usynǵandar.

«75 saılaý okrýgi boıynsha saılaýshylar tizimine 81 540 azamat kirdi, onyń 61 846-sy daýys berýge qatysty. Bul - 75,85%. Saılanǵan 75 ákimniń 28-i - memlekettik qyzmetshi. Onyń ishinde 17 adam sol aýyldyq okrýgte qaıta saılansa, jeti adam basqa aýyldyq okrýgterdiń ákimderi boldy», – dep atap ótti Erqara Aımaǵambetov.

Bes saılanǵan ákim - kommertsııalyq qurylymdardan, 17-i – bıýdjettik uıym qyzmetkeri, bireýi ýaqytsha jumys istemeıdi, úsh ákim – áıelder.

Saılanǵan ákimderdiń 61-in saıası partııalar usyndy: Nur Otan – 56, «Aýyl» QHDP – 3, «Aq Jol» QDP – 1, «ADAL» SP - 1.

Taǵy 14 – ózin-ózi usynýshylar.

«Osakarov aýdanynan Aıan Sháripov 100% «oń» daýys jınady. Aqtas jáne Darııa kentterindegi saılanýshylar arasyndaǵy daýysta eń az alshaqtyq boldy. «Barlyǵyna qarsy» eń kóp daýys sany (116) Aqtoǵaı aýdanynyń Shashýbaı kentinde tirkeldi - 7%. Daýysty qaıta esepteý júrgizilgen joq», - dep qosty Erkara Aımaǵambetov.