Qaraǵandy oblysynda 722 tonna azyq-túlik qory quryldy

QARAǴANDY. QazAqparat – Qaraǵandy oblysynyń turaqtandyrý qorynda 722 tonna kóleminde azyq-túlik qory quryldy. Bul azyq-túlik ónimderi: qant, qaraqumyq, ósimdik maıy. Sonymen qatar, apta saıyn belgilengen baǵamen saýdaǵa kókónis jetkizilimderi retke keltirildi, dep habarlaıdy QazAqparat tilshisi.

«Saryarqa» ÁKK-de turaqtandyrý qorynyń jumysy týraly aıtyp berdi.

«Turaqtandyrý qory azyq-túlik ónimderiniń baǵasyn ustap turýǵa arnalǵan. Eki mehanızm qoldanylady. Birinshisi – bakaleıa ónimderin ózimiz satyp alamyz jáne satamyz. Taýar ınterventsııalary komıssııanyń sheshimi boıynsha júrgiziledi.

Ótinimderdi qalalar men aýdandardyń ákimdikteri beredi, al kólemder aýyl sharýashylyǵy, kásipkerlik basqarmalarymen kelisiledi. Ekinshisi – shaǵyn jáne orta bıznes sýbektilerine 0,01% jeńildikpen nesıe berý. Kásipker belgili bir kezeńde ónimdi belgilengen baǵamen satýǵa mindettenedi. Aınalym dep atalatyn shema boıynsha kókónisterdi satý júrip jatyr», – dep túsindirdi «Saryarqa» ÁKK» AQ Basqarma tóraǵasynyń birinshi orynbasary Máýlen Ómirtaev.

Onyń aıtýynsha, jyl basynan beri shamamen 50 tonna bakaleıa ónimi kóleminde taýar ınterventsııalary júrgizilgen.

Aınalym shemasy boıynsha Qaraǵandyda kásipkerlerdiń birimen shart jasaldy.

Ónimniń tórt túri boıynsha jalpy kólemi 2000 tonna anyqtaldy: kartop – 1100, sábiz – 400, pııaz – 300, qyryqqabat – 200. Kásipker apta saıyn kókónisterdi oblys ortalyǵynyń sýpermarketterine, áleýmettik pavılondarǵa jetkizedi. ÁKK aqparaty boıynsha, ótken jyldyń qazan aıynan bastap jetkizilimder 500 tonnadan asty.

Qantqa keletin bolsaq, jaqyn arada azyq-túlik korporatsııasynan qosymsha 136 tonna kútilýde. Munyń bir bóligin taýar ınterventsııasyna jiberýge nıetti.

Qaraqumyq, ósimdik maıyn qosymsha satyp alý da josparda bar. Sonymen qatar, kúrish satyp alynady.

Máýlen Ómirtaev azyq-túlik ónimderin jetkizý geografııasyna da toqtaldy.

Barlyǵy el ishinde satyp alynady: qant – Tarazdan, qaraqumyq – Pavlodar oblysynan, ósimdik maıy – Shyǵys Qazaqstannan, kúrish – Qyzylordadan.

Taýardy saqtaý úshin ÁKK-niń óz qoımalary bar.

«Turaqtandyrý qoryn toltyrý úshin forvardtyq satyp alý tetigin de paıdalanýdy

josparlap otyrmyz. Memleket basshysy aýyl sharýashylyǵy ónimderine qatysty osyndaı tapsyrma bergeni belgili. Bul úshin qarajat jetkilikti. Biz kartop, sábiz, pııaz sekildi kókónisterdi satyp alýǵa kelisim jasaı alamyz. Baǵany belgilep, ónim jınalǵannan keıin qajet bolǵan jaǵdaıda aýylsharýashylyq taýar óndirýshilerden ónimdi ala alamyz. Qazir aýyl sharýashylyǵy basqarmasymen birlesip jumys istep jatyrmyz», – dedi Máýlen Ómirtaev.