Qaraǵandy oblysynda 7 myńǵa jýyq adam volonterlikpen aınalysady

QARAǴANDY. QazAqparat – Qaraǵandy oblysynda volonterlikti damytýdyń Jol kartasy qabyldandy. Oblystyq ákimdikte ótken onlaın rejımindegi apparattyq keńeste qoǵamdyq qozǵalysty qoldaý týraly aıtyldy, dep habarlaıdy QazAqparat tilshisi.

«Búgingi tańda óńirde 97 volonterlik uıym men top jumys isteıdi. Olarǵa shamamen 7 myń turǵyn kiredi. Kóbinese jastar. Jumystyń negizgi baǵyttary qaıyrymdylyq jáne áleýmettik volonterlik bolyp tabylady. Sondaı-aq, ekologııa jáne janýarlardy qorǵaý salasyndaǵy bastamalar belsendi damýda», – dedi jastar saıasaty máseleleri basqarmasynyń basshysy Birjan Álimjanov.

Volonterlerdiń front-keńsesi oblystyń jastar resýrstyq ortalyǵynyń janynda jumys isteıdi. Ol eriktiler qozǵalysyn úılestiredi jáne resýrstyq qoldaý kórsetedi. Barlyq qalalar men aýdandarda eriktiler shtaby bar. Sonymen qatar, oblysta Qoldau eriktiler ortalyǵy jumys isteıdi. Kovorkıng-ortalyqtar volonterlik toptardyń jınalatyn ornyna aınaldy.

Basqarma basshysy volonterlikti damytýdyń 2021–2023 jyldarǵa arnalǵan Jol kartasy týraly aıtyp berdi. Volonterlik uıymdarǵa granttar berý josparlanýda. Olardyń qyzmeti úshin tegin bólmeler bólinedi. Bıznes-qoǵamdastyqtyń qoldaýymen korporatıvtik volonterlikti damytý kózdelip otyr.

Onlaın rejıminde trenıngter uıymdastyrylady.

Elimizde volonterlik jyly dep jarııalanǵan 2020 jyl qozǵalystyń damýyna serpin berdi, dep atap ótti Birjan Álimjanov. Onyń aıtýynsha, bir jyl ishinde oblysta 1 500-den astam eriktiler aktsııasy ótkizildi. Al bıyl «El tiregi – Elbasy» aktsııasy aıasynda muqtaj otbasylarǵa 23 tonna azyq-túlik, sondaı-aq jeke qorǵanysh quraldary taratyldy.

Eriktiler Birgemiz: Saýlyq, Bilim, Taza Álem jáne t. b. jobalarǵa qatysady.

Qaraǵandy medıtsına ýnıversıtetiniń stýdenti Daryn Ábiljanov «Qazaqstannyń 100 jańa esimi» jalpyulttyq jobasynyń jeńimpazy, ol volonter-medıkter mektebin ashty. Myńǵa jýyq adam medıtsınalyq kómek kórsetýge jáne naýqastardy kútý erejelerine oqytyldy.

Eriktiler qozǵalysynyń jańalyqtaryn Jasprokrg_chat telegram-arnasynan bilýge

bolady.

«Volonterlik azamattyq qoǵamdy damytýda erekshe oryn alady. Oblysta belsendi eriktiler sany ósýde. Jol kartasyn iske asyrýǵa erekshe nazar aýdarý qajet. Biz volonterlik bastamalarǵa qajetti qoldaý kórsetemiz», – dep atap ótti oblys ákimi Jeńis Qasymbek.

Óńir basshysy volonterlik uıymdarǵa tegin oryn-jaı berý máselesin sheshýdi tapsyrdy. Ol Birgemiz baǵyty boıynsha jobalardy keńeıtý qajettigin atap ótti.