Qaraǵandy oblysynda 2023 jyly 10 jaıly mekteptiń qurylysy bastalady

QARAǴANDY. QazAqparat - Qaraǵandy oblysynyń qalalary men aýyldarynda 2025 jylǵa deıin 18 jaıly mektep salý josparlanǵan, bıyl jańa formattaǵy 10 oqý orny salyna bastaıdy, dep habarlaıdy QazAqparat Qaraǵandy oblysy ákimdiginiń resmı saıtyna silteme jasap.

Resmı saıttaǵy málimetterge qaraǵanda, oblys ákimdiginde «Jaıly mektep» ulttyq pılottyq jobasyn iske asyrý máseleleri boıynsha keńes ótti.

Óńir basshysy Ermaǵanbet Bólekpaev «Samruk-Kazyna Construction» AQ basqarma tóraǵasy Máýlen Aımanbetovpen kezdesti. Onda birinshi kezektegi sharalar talqylandy: jer ýchaskelerin resimdeý, ınjenerlik kommýnıkatsııalardy júrgizý, mektepterdi joǵary jyldamdyqty ınternetpen qamtamasyz etý.

– Bizdiń óńirlerge saparlarymyzdyń maqsaty – atqarylyp jatqan jumystar qarqynyn tekserý. Samruk-Kazyna Construction Úkimetiniń qaýlysymen «Jaıly mektep» ulttyq jobasy sheńberinde mektepter salý dırektsııasy belgilegen. Qazirgi ýaqytta biz ony iske asyrý boıynsha jergilikti atqarýshy organdarmen sharttar jasaımyz. Olardyń máni – ákimdikter bizge tapsyrys berýshiniń fýnktsııasyn tapsyrady, – dedi Máýlen Aımanbetov.

– Biz barlyq qajetti konkýrstardy ótkizemiz. EPC kelisimshartyna bastan-aıaq barlyq jumystar kiredi, ıaǵnı jabdyqty jobalaý, salý jáne jetkizý birden júredi. Aýyldarda, qalalar men megapolısterde biryńǵaı standart boıynsha oqýshylarǵa birdeı yńǵaıly jáne jaıly jaǵdaı jasalady.

Mektepterdiń jobalary oryndardyń sanyna baılanysty úlgili bolady. Arhıtektýralyq dızaın birtutas. Talaptar: zamanaýı jıhazdar men jabdyqtar, beınebaqylaý júıeleri. Ár mektepte STEM zerthanalary, robototehnıka kabınetteri, sport zaldary, kovorkıngter bolýy kerek. Erekshe balalar úshin kedergisiz orta qurý qajet.

Qaraǵandy oblysynda ártúrli syıymdylyqtaǵy – 300-den 2000 orynǵa deıingi jaıly mektepter salynady. Bıyl Qaraǵandyda tórt, Balqashta úsh, Buqar Jyraý aýdanynda eki, Shet aýdanynda eki nysannyń qurylysyn bastaý josparlanýda. Olar 2024 jyly tapsyrylýy tıis. Qaraǵandy, Abaı, Qarqaraly, Prıozersk qalalary jáne Nura kentinde 2024–2025 jyldarǵa taǵy segiz jańa mektep salý josparlanǵan.

Ermaǵanbet Bólekpaev óńirde «Jaıly mektep» ulttyq jobasyn oryndaý boıynsha Jol kartasy bekitiledi. Ony iske asyrý mektepterdegi úsh aýysymdyq, apattyq jáne oryn tapshylyǵy problemalaryn joıýǵa múmkindik beredi.