Qaraǵandy oblysynda 200 muǵalimniń orny bos tur

QARAǴANDY. QazAqparat – Qaraǵandy oblysynda muǵalimder jetispeıdi. 200 oryn bos qalyp otyr. Bul týraly oblystyq bilim basqarmasynyń basshysy málim etti, dep habarlaıdy QazAqparat tilshisi.

Óńirde fızıka, matematıka, hımııa jáne orys tili oqytýshylarynyń jetispeýshiligi baıqalady.

Muǵalimderdiń tapshylyǵyna baılanysty keıbir mektep basshylary zeınetkerlermen kelisimshartty uzartýǵa májbúr.

«Jyl basynan beri 728 oqytýshy qajet boldy. Búgin biz 500-ge jýyq muǵalimdi jumysqa qabyldadyq. Keıbir mektepterde konkýrs ótkiziledi. Kóptegen muǵalimder basqa qalaǵa kóshedi. Iá, kadr jetispeýshiligi problemasy bar», - deıdi oblystyq bilim basqarmasynyń basshysy Gúlsim Qojahmetova.

Sonymen qatar, Qarqaraly jáne Buqar jyraý aýdandarynyń eki mektebi apatty jaǵdaıda tur.

Olardy qalpyna keltirý jumystary kelesi jyly ǵana bastalatyndyqtan, oqýshylar eski ǵımaratta taǵy bir oqý jylyn ótkizýge májbúr bolady.

Vedomstvo basshysy oblys mektepteriniń 80% keńes ókimeti kezinde salynǵanyn jáne búginde tozǵanyn jasyrmady.