Qaraǵandy oblysynda 200 gektarǵa jýyq jer órtendi

QARAǴANDY. QazAqparat – Ótken táýlikte Qaraǵandy oblysynda 190 gektardan astam alqapta alty jerde qurǵaq shóp órtendi. Tabıǵı órtke aımaqtaǵy aptap ystyq sebep bolǵan, dep habarlaıdy QazAqparat tilshisi.

Qurǵaq shóp órti Qarqaraly, Osakarov, Abaı jáne Shet aýdandarynyń aýmaǵynda tirkeldi.

Mamandar tabıǵı órttiń sebebin aımaqta kúnniń qatty ystyq jáne aýa raıynyń jeldi bolýymen túsindirip otyr. «Qazgıdromet» málimetterine súıensek, 4 qyrkúıekte Qaraǵandy oblysynyń aýmaǵynda kúndiz 37 gradýsqa deıin qatty ystyq saqtalady.

Alǵashqy órt oshaǵy Osakarov aýdanynyń Kolektıvnoe aýylynan shyǵysqa qaraı 10 km jerdegi Qaraǵaıly aýylynda tirkeldi. Dala órtin sóndirýge Qaraǵandy oblysy TJD kúshteri men quraldary qatysty: 7 qyzmetker jáne 3 tehnıka, sondaı-aq quramynda 10 qyzmetker men 2 tehnıka bar erikti órt sóndirý quramy qatysty.

Sol kúni Qarqaraly aýdanynyń Abaı jáne Besoba aýyldyq okrýgterinde jalpy aýdany 90 ga jerde qurǵaq shóp órtendi.

Taǵy bir órt oshaǵy Taldyqudyq aýylyna jaqyn Abaı aýdanynda tirkeldi. Jalpy aýdany 4 ga ashyq aýmaqta qurǵaq shóp pen butalar janǵan.

4 qyrkúıek kúni saǵat 1:09-da Shet aýdanynda Qarǵaly aýylynan soltústikke qaraı 20 km jerde 40 ga alańda qurǵaq shóp órtendi. Tabıǵı apatpen 15 qyzmetker jáne 5 tehnıkadan turatyn quram kúresti.

Qazirgi ýaqytta Shet aýdanyndaǵy Jambyl kentinde qurǵaq shóptiń janýy baqylaýda.

«Dala órti óte qaýipti. Kóptegen jaǵdaılarda olar basqa da apatty órtke – orman órtine nemese eldi mekenderdegi órtke sebep bolady. Sonymen qatar, jeldi aýa raıynda órt eldi mekenderdi sharpýy múmkin. Qurǵaq shóp janǵanda qatty tútindeıdi jáne orman órti adamdardyń densaýlyǵy úshin qaýipti», - dep eskertti Qaraǵandy oblystyq TJD-den.

Órt sóndirýshiler apattyń aldyn alý úshin órt qaýipsizdiginiń qarapaıym erejelerin bilý jáne saqtaý qajettigin eske salady. Órt shyqqan jaǵdaıda dereý 101 jáne 112 telefondaryna qońyraý shalý kerektigin qaperge beredi.