Qaraǵandy oblysynda 2 baldyq jer silkinisi tirkeldi
«Óńirdegi jer silkinisiniń qýattylyǵy - 2 ball. Ol seısmıkalyq stantsııa jelisinde 9 tamyz kúni Almaty ýaqytymen 5 saǵat, 28 mınýtta tirkeldi», - dep habarlady TJ departamentiniń baspasóz qyzmeti.
Qaraǵandy oblysynda ınfraqurylymdardyń buzylýy, zardap shekkender nemese apatty jaǵdaıdyń qurbany bolǵandar joq.
«Zilzala oshaǵy Almaty qalasynyń soltústik-shyǵysyndaǵy 485 kılometrde Qytaı aýmaǵynda ornalasqan», - delingen Qaraǵandy oblysy TJD baspasóz qyzmetiniń habarlamasynda.
Qutqarýshylar mundaı jaǵdaılarda úreıge boı aldyrmaı, nusqaýlyqtardy qatań qadaǵalaýǵa shaqyrady.
«Ǵımarattyń teńselýin, shamdardyń terbelýin, zattardyń qulaýyn, áınekterdiń shyldyrlaǵanyn sezinseńiz, dúrligýdiń qajeti joq. Qujattaryńyz, aqsha jáne eń qajetti zattaryńyzdy alyp ǵımarattan shyǵyńyz. Lıft emes, baspaldaq arqyly tómenge túsińiz. Kóshede bolsańyz, sol jerde qalyńyz, alaıda ǵımaratqa jaqyn turmańyz. Ashyq keńistikke ótińiz. Sabyrlylyq saqtap, basqalardy da tynyshtandyrýǵa tyrysyńyz. Al, eger amalsyz ǵımarattyń ishinde qalyp qoısańyz, qaýipsiz jerlerge: ishki qabyrǵanyń qasyna, buryshyna, ishki qabyrǵa oıyǵyna nemese súıenishterdiń qasyna turyńyz. Múmkin bolsa, ústeldiń astyna tyǵylyńyz, ol qulaǵan zattardan qorǵaıdy», - delingen habarlamada.