Qaraǵandy oblysynda 18 jastaǵy sarbaz qaıtys boldy

QARAǴANDY. QazAqparat - Qaraǵandy oblysynyń Abaı aýdanynda menıngıtten merzimdi áskerı qyzmettegi sarbaz qaıtys boldy. 18 jastaǵy jigit Túrkistan oblysynan shaqyrylǵan, dep habarlaıdy QazAqparat tilshisi.

«Ortalyq» óńirlik qolbasshylyǵynyń baspasóz qyzmeti habarlaǵandaı, qaza tapqan jigit 6505 áskerı bóliminde qyzmet etken. 2 aqpanda tańǵy saǵat 8.00-de ol ózin álsiz sezinetinin aıtqan. Sanıtarlyq nusqaýshy júrgizgen tekseristen keıin ol Abaı qalasynyń Ortalyq qalalyq aýrýhanasyna jatqyzyldy. Aýrýhanaǵa jatqyzylǵannan keıin onyń jaǵdaıy kúrt nasharlap, sarbaz jansaqtaý bólimine aýystyryldy. Saǵat 11.00-de dárigerler onyń qaıtys bolǵanyn habarlady.

«Sot-medıtsınalyq saraptamaǵa sáıkes, áskerı qyzmetshiniń ólimine menıngokokty ınfektsııa sebep bolǵan. Atalǵan fakti boıynsha tergeý amaldary júrgizilýde. «Ortalyq» óńirlik qolbasshylyǵynyń qolbasshylyǵy men jeke quramy qatardaǵy jaýynger Jaqyp Ramazan Meırambekulynyń kenetten qaıtys bolýyna baılanysty qaıǵyryp, týystary men jaqyndaryna shyn júrekten kóńil aıtady», - dep habarlady baspasóz qyzmeti.

Vedomstvo sonymen qatar, qatardaǵy sarbaz qyzmet etken bólimshede epıdemııaǵa qarsy is-sharalar júrgizilip, karantın engizilgenin málim etti.

Barlyq baılanysta bolǵan adamdar Qaraǵandy oblysy boıynsha Ulttyq saraptama ortalyǵynda menıngokokktyń bar-joǵyna tekserýden ótti.