Qaraǵandy oblysynda 150-ge jýyq eldi mekendi sý basý qaýpi bar
Óńirde ózen arnalaryna sanatsııa júrgizildi, sý burý arnalary salyndy jáne jóndeldi. Aýyldar men kentterde qosymsha jergilikti habarlaý júıeleri ornatyldy.
Qaraǵandy oblysynyń ákimi Ermaǵanbet Bólekpaevtiń tóraǵalyǵymen ótken otyrysta sý tasqynyna daıyndyq barysy talqylandy.
Oblystyń Tótenshe jaǵdaılar departamentiniń bastyǵy Murat Qatpanov qar jamylǵysynyń kosmomonıtorıngi qyzmetterine jáne oblys ózenderinde jarylys jumystaryn júrgizýge jaǵdaı jasalatynyn habarlady. 1 naýryzdan bastap sý ótkizgish qubyrlar men kópirlerdi tazalaý jumystaryn bastaý josparlanýda.
Qańtar aıynda ózenderdiń joǵary jaqtarynyń qanshalyqty qar basqanyn anyqtaý úshin aralaý bastalady. Sonymen qatar sý tasqyny qaýpi bar barlyq eldi meken tekseriledi. Qazirgi tańda olardyń sany – 149.
Naýryz aıynda sý tasqynyna qarsy oblystyq shtab jumys isteı bastaıdy.
Sý tasqyny kezeńine daıyndyq týraly qalalar men aýdandardyń ákimderi de esep berdi.
Ermaǵanbet Bólekpaev barlyq jaýapty tulǵalarǵa sý tasqynyna qarsy barlyq is-sharany úılestirýdi jáne sapaly iske asyrýdy qamtamasyz etýge tapsyrma berdi.
«Sý basýdyń aldyn alý úshin barlyq qosalqy stantsııalardy tekserý qajet. Qalalar men aýdandardyń ákimderine qardy jedel shyǵarýdy tapsyramyn. Qajet bolsa, qosymsha tehnıkany tartyńyzdar. Barlyq táýekelderdi boldyrmaý úshin bárin muqııat tekserip alyńyzdar», - dep atap ótti aımaq basshysy.
Foto Qaraǵandy oblysy ákimdiginen