Qaraǵandy oblysynda 11 jańa kásiporyn ashylady

QARAǴANDY. QazAqparat – Qaraǵandy oblysynyń ákimi Ermaǵanbet Bólekpaev OKQ alańynda ótken brıfıng barysynda jańa ınvestıtsııalyq jobalar týraly aıtyp berdi, dep habarlaıdy QazAqparat.

Qaraǵandy oblysynda 52 jobanyń ınvestıtsııalyq pýly quryldy. Jańa kásiporyndar ashý 12 myń turaqty jumys ornyn qurýǵa múmkindik beredi.

«Bıyl on bir joba iske qosylady, onyń úsheýi sheteldik qatysýmen. 2179 jumys orny qurylady. Búgingi tańda bir joba iske qosyldy», - dedi aımaq basshysy.

Bıylǵy jobalardyń biri – Saran qalasynda turmystyq tehnıka shyǵaratyn zaýyt salý. Munda myńnan astam adam jumysqa ornalasady.

Qaraǵandy oblysynda monoqalalardy damytýǵa basa nazar aýdarylýda. Osylaısha, Saran ındýstrııalyq aımaǵy keńeıýde. Osynyń arqasynda alty myń jumys orny ashylady.

Óńirdegi monoqalalarynyń tizimine Balqash endi. Qalany damytý boıynsha 66 is-sharadan turatyn keshendi bes jyldyq jospar ázirlendi. Negizgi mindet – Balqashtyń áleýetin arttyrý jáne ony jergilikti jáne sheteldik týrıster úshin tartymdy etý.