Qaraǵandy oblysynda 11 kópbalaly otbasy qonys toıyn toılady
Ár úıdiń janynda jer ýchaskesi men sharýashylyq qurylystary bar. Baqsha egip, úı sharýashylyǵyn júrgizýge bolady.
Farıda Kómekovanyń otbasynda jeti bala bar. Bul kúndi ol uzaq jyldar boıy kútti. Buryn otbasy jaldamaly eki bólmede turyp kelgen bolatyn. Endi januıa 12 sotyq jer ýchaskesi bar úlken tórt bólmeli úıde qonys toıyn toılady.
«Kúıeýim ekeýmiz de jumys isteımiz, biraq biz úshin baspanaly bolý - sheshilmegen qıyn másele bolǵan edi. Búgin - biz úshin eń baqytty kún!» - deıdi kópbalaly ana, «Kúmis alqa» ıegeri Farıda Kómekova.
Lázzat Ahmaǵanbetova turǵyn úı alý kezeginde 13 jyl turǵan. Onyń bes balasy bar. Endi ol da óziniń 4 bólmeli úıine qonystanady.
«Men sońǵy kúnge deıin baspanaly bolatynymyzǵa sene almadym!» - dep qýanyshymen bólisti kópbalaly ana.
Jańa qonystanýshylarǵa kilt tabystaý naǵyz merekege aınaldy. Saltanatty rásimge Qaraǵandy oblysynyń ákimi Erlan Qoshanov pen «Astana Motors» kompanııasynyń prezıdenti Nurlan Smaǵulov keldi. Osy kompanııanyń arqasynda aýyl turǵyndary baspanaly bolyp otyr. Bul úılerdi «Astana Motors» óz esebinen jóndep, abattandyryp, olardy kópbalaly jáne kómekke muqtaj otbasylarǵa syıǵa tartty.
Erlan Qoshanov Elbasynyń tapsyrmasy boıynsha óńirde kópbalaly otbasylarǵa erekshe kóńil bólinetinin atap ótti. Bul januıalardyń árqaısysy úshin eń ózekti másele - baspana. Bul máseleni sheshýge kásipkerler kómektesýde. Bıyl kezekte turǵandar qatarynan 700 otbasy páter kiltterin alady. Onyń úshten biri bıznesmenderdiń kómegimen jańa baspanaǵa qonystanady.
«Táýelsizdigimiz qalyptasa bastaǵannan beri memleket kásipkerlerdi qoldap keledi. Búginde bıznes aıaǵyna nyq turyp, memleketke áleýmettik máselelerdi sheshýge kómektesetin kez keldi. Balalarymyz ben nemerelerimiz osyndaı adamdardy úlgi ete otyryp, ósip-ónýi tıis. Dál osyndaı sharalar «Týǵan jer» ıdeıasyn - ár azamat óziniń týǵan jerine, otanyna kómek kórsetý kerektigin naqty mysal retinde kórsetedi», - dep atap ótti Erlan Qoshanov.
Ol «Astana Motors» kompanııasyna kópbalaly otbasylarǵa kómek kórsetkeni úshin alǵys aıtty. Sondaı-aq, jergilikti mekteptiń talantty túlekteri elimizdiń úzdik joǵary oqý oryndarynda bilim alý múmkindigine ıe bolǵany úshin de rızashylyǵyn bildirdi. Oǵan Nurlan Smaǵulov qurǵan Bilim qory kómektesedi.
«Aqadyr - meniń kishi Otanym. Bul jerde meniń ákem ósip, balalyq shaǵyn ótkizgen. Bul jer - meniń ata-babalarym úshin ystyq meken. Tabysqa jetken kez kelgen adam óziniń Otany aldyndaǵy qaryzyn qaıtarýy tıis. Men búgin óz týystaryma kómektesip jatqanyma qýanyshtymyn. Bizdiń kompanııa qaıyrymdylyqpen belsendi túrde aınalysady, adamdarǵa kómektesedi. Bul - bizdiń tujyrymdamamyz, bizdiń ómir saltymyz jáne bizdiń fılosofııamyz», - dedi Nurlan Smaǵulov.
Ol kompanııa budan ári Aqadyr turǵyndaryna kómektesetinin aıtyp, ýáde berdi. 2011 jyly «Astana Motors» balalar-jasóspirimder sport mektebin saldy. Onda balalar basseıni men kúres zaly bar. Sporttyq nysanda dzıýdo, sambo, qazaqsha kúres, fýtbol chempıonattary ótedi. Mektep tárbıelenýshileri árdaıym halyqaralyq jarystarǵa shyǵyp, júldeli oryndarǵa ıe bolady.
Bıyl Aqadyr kentinde 70 páterli turǵyn úı qalpyna keltirilip, paıdalanýǵa berildi. Qonystanýshylar arasynda kópbalaly otbasylar da boldy. Olardyń barlyǵy turǵyn úı alýǵa kezekte turǵandar tiziminde bolǵan. Shet aýdanynda barlyǵy 41 kópbalaly otbasy turady.
Bıyl kentte 32 páterli úı salynady. Kelesi jyly taǵy eki kópqabatty úı paıdalanýǵa beriledi.