Qaraǵandy oblysynan Tokıo Olımpıadasyna baratyn sportshylar belgili boldy

QARAǴANDY. QazAqparat – Qaraǵandy oblysynan jeti sportshy 6 lıtsenzııa jeńip aldy. Qazaqstannyń paralımpıada quramasyna eki qaraǵandylyq kirdi. Tokıoda ótetin XXXI jazǵy Olımpıada oıyndary qarsańynda oblys ákimi sportshylarmen jáne olardyń tálimgerlerimen áńgimelesti. Kezdesý onlaın formatta ótti, dep habarlaıdy QazAqparat tilshisi.

Qaraǵandy oblysy dene shynyqtyrý jáne sport basqarmasynyń basshysy Temirhan Abylaev olımpıadalyq lıtsenzııa ıegerleriniń esimderin atady.

«Jeti sportshymyz alty lıtsenzııa jeńip aldy. Olar: Abylaıhan Júsipov (boks), Elmıra Syzdyqova (áıelder kúresi), Aleksandra jáne Ekaterına Nemıch (sınhrondy júzý), Jansaı Smaǵulov pen Islam Bozbaev (dzıýdo), Marııa Ovchınnıkova (jeńil atletıka). Bizdiń óńirden Paralımpıadaǵa sportshylar jeti lıtsenzııa jeńip aldy. Paralımpıada sport komıtetiniń sheshimi boıynsha onyń tek ekeýine kvota berildi. Ulttyq quramaǵa Dastan Muqashbekov (jeńil atletıka) jáne Álııa Rahymbekova (júzý) kirdi», – dedi Temirhan Abylaev.

Jeńis Qasymbek oblysta sportqa erekshe kóńil bólinetinin atap ótti.

Fýtbol alańdary men zamanaýı DSK-lar salynýda, zamanaýı sport nysandary tapsyrylady, oblystyń barlyq aýyldary men qalalarynda sport zaldary jóndelip jatyr.

Sportshylardyń jalaqysy artty. Olar medıtsınalyq qyzmetpen tolyq qamtamasyz etilgen.

«Sizder 1,5 jyldan beri kúrdeli jaǵdaıda jattyǵyp kelesizder. Qazirgi jaǵdaı bárimizge áser etedi. Biraq osynyń barlyǵyna qaramastan, biz sizderdiń jeńisterińizdi asyǵa kútemiz jáne sizderge úlken tabys tileımiz», – dedi aımaq basshysy.

Esterińizge sala keteıik, Tokıoda jazǵy Olımpıada oıyndary 23 shilde men 8 tamyz aralyǵynda, Paralımpıada oıyndary 24 tamyz ben 5 qyrkúıek aralyǵynda ótedi.