Qaraǵandy oblysynan Parlament Senatynyń depýtattyǵyna úsh kandıdat tirkeldi

QARAǴANDY. QazAqparat – Qaraǵandy oblystyq saılaý komıssııasy Parlament Senatynyń depýtattyǵyna kandıdattardyń tirkelgeni týraly habarlady. Qazirgi ýaqytta bul protsedýradan úsh úmitker ótti. Aldaǵy ýaqytta úmitkerler sany artýy múmkin, dep habarlaıdy QazAqparat tilshisi.

Oblystyq saılaý komıssııasynyń aqparaty boıynsha, tirkelgender tizimi tómendegideı:

- ózin-ózi usynǵan Murat Ábilov, Qaraǵandy oblysynyń jeke sot oryndaýshylary palatasy basshysynyń orynbasary;

- Nura jáne Osakarov aýdandarynyń máslıhattary usynǵan kandıdat Serik Óteshov, Qaraǵandy oblystyq máslıhatynyń hatshysy;

- ózin-ózi usynǵan Tatıana Shatohına, Qaraǵandy oblysynyń Kásipodaq ortalyǵy tóraǵasynyń orynbasary.

OSK bekitken kúntizbelik josparǵa sáıkes Parlament Senatynyń depýtattyǵyna kandıdattardy usyný 29 qarashada bastalyp, 14 jeltoqsanda saǵat 18:00-de aıaqtalady. Úmitkerlerdi tirkeý 24 jeltoqsanda saǵat 18.00-ge deıin jalǵasady. Saılaý aldyndaǵy úgitke 19 kún anyqtaldy – 24 jeltoqsannan 13 qańtar, saǵat 00:00-ge deıin.

13 qańtar – tynyshtyq kúni. 14 qańtar – daýys berý kúni. 20 qańtarǵa deıin OSK saılaý qorytyndylaryn jarııalaıdy.

Esterińizge sala keteıik, Memleket basshysynyń Jarlyǵymen Parlament Senatynyń depýtattaryn saılaý 2023 jylǵy 14 qańtarǵa taǵaıyndaldy.

Senatty qalyptastyrý tártibi QR Konstıtýtsııasynda aıqyndalǵan. Parlamenttiń joǵarǵy palatasynda ár oblystan, respýblıkalyq mańyzy bar qaladan jáne Astanadan eki adam usynylǵan. Senat depýtattaryn janama saılaý quqyǵy negizinde saılaýshylar – máslıhat depýtattary jasyryn daýys berý arqyly saılaıdy. Senat depýtattarynyń ókilettik merzimi alty jyldy quraıdy. Bul rette jartysy úsh jyl saıyn qaıta saılanady.