Qaraǵandy oblysy jylytý maýsymyna 90% daıyn
Oblys ákimi Jeńis Qasymbektiń tóraǵalyǵymen onlaın-formatta ótken apparattyq keńeste óńirdiń qysqy kezeńge daıyndyǵy týraly aıtyldy.
Búginde óńirdiń barlyq stantsııalarynda negizgi jáne qosalqy jabdyqtarda josparly kúrdeli jóndeý jalǵasyp jatyr.
Energokeshenderdi, áleýmettik nysandar men TKSh nysandaryn daıyndaý bekitilgen jospar boıynsha júrgizilýde.
«Segiz energııa kózderinde 26 qazandyq pen 15 týrbınany jóndeý kózdelgen. 72 qazandyq, 693 avtonomdy jylytý júıesi, 115 shaqyrym jylý jelisi, 3 300 shaqyrym elektr jelisi, 310 shaqyrym sý qubyry jáne káriz jelilerin daıyndaý boıynsha jumys júrgizilip jatyr. 10 qazandyq pen 6 týrbınada jumystar aıaqtaldy. 13 qazandyq pen taǵy 6 týrbına jóndelip jatyr», – dedi Energetıka jáne TKSh basqarmasynyń basshysy Ulantaı Úsenov.
Barlyq stantsııalar kómir jetkizý boıynsha kelisimshart jasady. Otyn kómir qoımalaryna túsirilip jatyr. Qajetti qor bar.
Aldaǵy kúzgi-qysqy kezeńge shamamen 4 mln tonna kómir daıyndalady.
Óńir basshysy bıýdjettik uıymdarǵa, birinshi kezekte bilim uıymdary men medıtsınalyq mekemelerge kómirdi ýaqtyly jetkizýdi qamtamasyz etýdi tapsyrdy.
Bılik ókilderi qaraǵandylyqtardy qazirden bastap otyn qamyn oılastyryp qoıýǵa shaqyrady.
Oblystyń qalalary men aýdandarynyń ákimderi aldaǵy jylytý maýsymyna daıyndyqty turaqty baqylaýda ustaıdy.
«Jylytý maýsymynyń bastalýyna az ǵana ýaqyt qaldy. Josparlanǵannyń bárin ýaqytynda aıaqtaý kerek. Barlyq ákimder men oblystyq basqarma basshylary tirshilikti qamtamasyz etý nysandaryndaǵy jóndeý jumysyn aıaqtaýy tıis», – dep atap ótti Jeńis Qasymbek.