Qaraǵandy oblysy pılottyq aımaqtar qataryna kirdi
«Smart-sıtı baǵyty boıynsha Qaraǵandy oblysy pılottyq aımaqtar qataryna endi. Bizdiń maqsatymyz - jańa tehnologııalar arqyly qalalyq ortany Elbasy aıtqandaı ómir súrýge jáne jumys isteýge jaıly bolatyndaı etip uıymdastyrý bolyp tabylady. Búgingi tańda 2018 jyldyń sońynda iske qosylatyn memlekettik-jekemenshik seriktestik mehanızmi boıynsha biryńǵaı úılestirý ortalyǵy qurylýda. Ol «Aqyldy qalanyń» ıntegratsııalyq ózegi bolady», - dedi Erlan Qoshanov.
Oblys ákimi Smart-sıtı elementterin kezeń-kezeńmen engizý úshin álemdik tájirıbe zerttelgenin aıtty.
«Beınesaraptaý jáne oqıǵalyq habarlaýy bar aýqymdy baqylaý júıesi bar «Qaýipsiz qala» júıesinen bastadyq. Qazirgi tańda Qaraǵandyda qaýipsizdikti qamtamasyz etýge arnalǵan oblystyq ІІD jedel basqarý ortalyǵyna qosylǵan 3000-nan astam beınekameralar jumys isteıdi», - dep jetkizdi aımaq basshysy.
Ol bir jyl kóleminde taǵy da 12 000 jeke kásiporyndar, bilim jáne densaýlyq uıymdarynyń kameralaryn qosý josparlanyp otyrǵanyn aıtty.
Aımaǵymyzda densaýlyq saqtaý jáne bilim berý salalarynda aqparattyq júıe damyp keledi. Qaraǵandyda mamyr aıynda engiziledi dep josparlanyp otyrǵan elektrony bıletteý júıesin jáne elektrondyq dıspetcherleýdi engizý boıynsha jumystar bastaldy.
«TKSh salasynda biz kommýnaldyq qyzmet sapasyna monıtorıng júrgizýdi engizbekpiz. Keleshekte kelesi kezeńge saı qalanyń ómirshendigin basqarýdyń aqyldy júıeleri paıda bolýy tıis. Smart-sıtı tehnologııalaryn biz Qaraǵandyda engizip jatyrmyz, alaıda keleshekte bul tájirıbe oblysymyzdyń basqa aımaqtarynda da júzege asyrylady, - dep jalǵastyrdy sandyq júıege aýysýy tıis salalar tizimin Erlan Qoshanov.
Oblys ákimi Kásipkerlik basqarmasyna qala jáne aýdan ákimderimen, sondaı-aq qyzyǵýshylyq tanytqan kásipkerlermen birigip sandyq tehnologııalardy engizý jumystaryn jalǵastyrýdy tapsyrdy.