Qaraǵandy oblysy Qazaqstannyń úzdik sport aımaǵy bolyp tanyldy

QARAǴANDY. QazAqparat – QR Mádenıet jáne sport mınıstrligi jyl qorytyndysyn shyǵardy. Qaraǵandy oblysy Qazaqstannyń úzdik sport óńiri, al tennısshi Alan Qurmanǵalıev – elimizdiń úzdik jas sportshysy dep tanyldy, dep habarlaıdy QazAqparat tilshisi.

Mamandandyrylǵan vedomstvo ókilderi ǵana emes, qoǵam qaıratkerleri de kiretin arnaıy komıssııa óńirlerde júrgizilgen jumystardyń nátıjelerin birneshe ólshemsharttar boıynsha baǵalady. Bul buqaralyq sportty, ınfraqurylymdy damytý, jańa qyzyqty jobalardy iske asyrý jáne basqa da mańyzdy baǵyttar.

Keshe Astanada mınıstrlik uıymdastyrǵan «2022 jyldyń qorytyndysy» saltanatty rásimi ótti. Eki ret sahnaǵa oblys ókilderi shyqty.

Dene shynyqtyrý jáne sport basqarmasynyń basshysy Temirhan Abylaev «Úzdik sport aımaǵy» nomınatsııasy boıynsha marapat alý úshin jáne Qazaqstan tarıhynda tuńǵysh ret ústel tennısinen álem chempıony jáne Azııa chempıonatynyń júldegeri atanǵan Alan Qurmanǵalıev «Jastar men jasóspirimder quramynyń úzdik sportshysy» nomınatsııasynyń jeńimpazy retinde shyqty.

«Bıyl bizde kóptegen jeńister men jetistikter boldy. Biraq alda áli kóp jumys bar. Kelesi jyl Olımpıadaǵa deıingi jyl, onda bizdiń qurama komandalar lıtsenzııalardy barynsha kóp jeńip alýy kerek. Árıne, basty maqsat – Parıj-2024 olımpıadasy», – dedi Mádenıet jáne sport mınıstriniń orynbasary Serik Jarasbaev quttyqtaý sózinde.

«Árıne, biz óz eńbegimizdi joǵary baǵalaǵanyn maqtan tutamyz. Bul, eń aldymen, oblys ákimdiginiń jumysy men qoldaýynyń nátıjesi. 2022 jyly shyn máninde kóp nárse jasaldy, múgedekter sporty salasynda jańa jobalar iske asyryldy. Bizde aldaǵy jylǵa óńirde sportty damytý boıynsha kóptegen josparlar bar», – dedi Temirhan Abylaev.