Qaraǵandy oblysy BAÁ eline qoı etin eksporttaıdy
Bul týraly búgin OKQ-da baspasóz máslıhatyn ótkizgen Qaraǵandy oblysynyń ákimi Erlan Qoshanov málim etti.
«Qaraǵandy oblysy ónerkásipti óńir ekenin bilesizder. Degenmen, aýyl sharýashylyǵyna da basa mańyz berip kelemiz. Sebebi, atalǵan salany damytýdyń mańyzy óte erekshe. Bıyl 12 mlrd teńgege 3 myńǵa jýyq taýar óndirýshige qoldaý kórsetildi. Sonymen qatar, bizdiń oblystaǵy klımattyń qolaısyzdyǵyna baılanysty egin sharýashylyǵyn damytýda kúrdeli tustary da bar. Sondyqtan, aldaǵy ýaqytta mal sharýashylyǵyna basymdyq berý jón dep otyrmyz. Osy sebepti mal etin eksporttaýdy qolǵa aldyq», - deıdi Qaraǵandy oblysynyń ákimi.
Erlan Qoshanovtyń aıtýynsha, qazirgi tańda Qaraǵandy oblysynyń kásiporyndary Birikken Arab Ámirlikteriniń naryǵyna shyqqan.
«Qaraǵandy oblysy osy elge qoı etin eksporttaı bastady. Bıyldyń ózinde 1 200 qoıdyń etin BAÁ eline jetkizýdi josparlap otyrmyz. Sonymen birge, óńirdegi bir kásiporyn bıeniń qurǵaq sútin Eýropaǵa eksportqa shyǵara bastady. Bıyl kásiporyn keńeıip, óndiris qýaty eki esege artty. Jańa jumys oryndary ashyldy. Jalpy, Qaraǵandy oblysynda aýyl sharýashylyǵy ónimderin eksporttaý 24 paıyzǵa ósip otyr», - deıdi Erlan Qoshanov.