Qaraǵandy oblysy aýmaǵynyń 75 paıyzy áli qar astynda jatyr

QARAǴANDY. QazAqparat – Qaraǵandy oblysynda sý tasqynynyń aldyn alý jumystary júrip jatyr. Eldi mekenderden qar shyǵarylyp, nóser jáne sý ótkizgish qubyrlar tazalanýda. Ózenderde muzdy kesý jáne burǵylaý bastaldy, dep habarlaıdy QazAqparat tilshisi.

Sý tasqyny jaǵdaıy týraly apparattyq keńeste oblystyq TJD bastyǵy Murat Qatpanov baıandady.

«Kosmomonıtorıngtiń málimetinshe, búginde oblys aýmaǵynyń 75 % qar astynda. Nura ózeniniń basseıni boıynsha ylǵal qorynyń kólemi ortasha kópjyldyq mánnen 28% joǵary, qalǵan ózender normadan 3-10% tómen. Oblystyń iri sý qoımalary – Samarqan jáne Yntymak sý qoımalarynan – shyǵyny 5-8 tekshe metr/sek sanıtarııalyq tógindiler júrgizilýde. Eldi mekenderden 2,1 mln tekshe metr qar shyǵaryldy», – dep habarlady vedomstvo basshysy.

Sý tasqyny qaýpi bar óńirlerde aldyn alý sharalary jalǵasyp jatyr.

110 km sý burý transheıalary salyndy, 158 km kanaldar men aryqtar tazartyldy, 3923 birlik sý ótkizgish qubyrlar men 398 kópir tazartyldy.

Sý tasqynyna qarsy qabyldanyp jatqan sharalar týraly qalalar men aýdandardyń ákimderi de baıandady.

Oblys ortalyǵynda nóser kárizderin tazartýǵa basa nazar aýdaryldy. Solonka ózenine sanatsııa júrgizildi.

Sonymen qatar, Ońtústik-Shyǵysta, Muqanov kóshesiniń boıynda daladan erigen sý aǵyndaryn ustap turý úshin qorǵanys biligi jasaldy.

Ýnıversıtet kóshesinde sý ótkizgishter tazalanyp, baqylaý kamerasy ornatyldy.

Qaraǵandy ákimi Meıram Kojýhovtyń aıtýynsha, qajet bolǵan jaǵdaıda Táttimbet kóshesiniń kópqabatty úıleriniń boıynda qapshyqtan qorǵanysh bilik salynady.

Oblys ákimi Ermaǵanbet Bólekpaev aldyn alý sharalary boıynsha tapsyrma berdi.

«Sý tasqyny protsesteri bastaldy. Tasqyn sýlardyń apatsyz ótýi úshin sý burý, aryqtar, naýalar, nóserli káriz júıeleriniń daıyndyǵyn barlyq jerde qamtamasyz etý qajet. Sondaı-aq, jeke aýmaqtardy qar men qoqystan tazartý boıynsha halyqpen túsindirý jumystaryn jandandyryńyz», – dedi óńir basshysy.

Sonymen qatar, barlyq gıdroqurylystardyń daıyndyǵy men jumysy turaqty baqylaýda.

Aptanyń sońyna deıin avtojoldardaǵy sý ótkizý qurylystaryn tazalaýdy aıaqtaý qajet.