Qaraǵandy oblysy aldaǵy aıazdy kúnderge daıyn ba

QARAǴANDY. QazAqparat – Qaraǵandy oblysynda osy aptada sınoptıkter qatty aıaz bolady dep boljap otyr. Temperatýranyń tómendeýine baılanysty óńir basshysy Jeńis Qasymbek jylý kózderiniń jumysyna baqylaýdy kúsheıtýdi tapsyrdy. Ol turǵyndardyń shaǵymyna jedel jaýap berýdi talap etti, dep habarlady QazAqparat tilshisi.

Energetıka jáne TKSh basqarmasynyń basshysy Ulantaı Úsenovtyń aıtýynsha, oblysta jylytý maýsymy shtattyq rejımde ótýde.

Onyń aıtýynsha, barlyq JEO men qazandyqtar temperatýralyq rejımge shydaıdy.

«Osy aptada 30 gradýsqa deıin aıaz bolady dep boljanǵan. Qazirdiń ózinde óte sýyq. Jylýǵa baılanysty kez kelgen shaǵymdy nazardan tys qaldyrmaýdy talap etemin. Aýqymdy suraqtarmen ǵana aınalyspańyzdar. Jeke úıde, kireberiste problemalar bolsa, jedel áreket etińizder, sheshimin izdeńizder», - dedi Jeńis Qasymbek.

Esterińizge sala keteıik, ákimder jylytý maýsymynyń turaqty ótýine derbes túrde jaýapty bolady.

Úıge kirgenge deıin jylý berý júıesiniń kidirissiz jumysyn qyzmet kórsetýshiler qamtamasyz etedi.

Al jylytý júıesiniń jaǵdaıy men turaqty jumysyn PIK pen turǵyndardyń ózderi qadaǵalaýy tıis.